<p style="text-align: justify;">مهترلام (پژواک، ۲۳ سلواغه ۱۴۰۲) : د لغمان د کرنې ریاست مسوولین وایي، د دغه ولایت په مرکز او درېیو ولسوالیو کې د مرستندیه بنسټونو له لوري پر ۲۳۰ هکتاره ځمکه بېلابېل ډوله باغونه جوړ شوي دي.</p>
<p style="text-align: justify;">د لغمان د کرنې، اوبو لګولو او مالدارۍ رییس مولوي محمدولي محسن پژواک خبري اژانس ته وویل، په تېر یو کال کې د ملګرو ملتونو پراختیایي پروګرام او د کرنې او خوړو نړۍوال پروګرام په مالي ملاتړ د ۱۶ اعشاریه ۶ میلیون افغانیو په لګښت د خصوصي سکټور اړوند د مهترلام ښار سربېره په الینګار، الیشنګ او قرغیو ولسوالیو کې د لیمو، مالټې، سرهاملوک او شفتالو باغونه جوړ شوي دي.</p>
<p style="text-align: justify;">نوموړي وویل چې د یادو باغونو له ډلې ۴۰ هکتاره یې په مهترلام ښار کې، ۱۸۴ هکتاره په قرغیو کې، ۳ هکتاره په الیشنګ کې او ۳ هکتاره نور په الینګار ولسوالیو کې جوړ شوي دي.</p>
<p style="text-align: justify;">ورته مهال، هغه کسان چې پر ځمکو یې باغونه جوړ شوي خوښ دي او له حکومت او همکارو ادارو په بېلابېلو برخو کې د لا ډېرې همکارۍ غوښتنه کوي.</p>
<p style="text-align: justify;">د الینګار ولسوالۍ اړوند د لوکاړ سیمې یو بڼوال حضرتالله وايي، د کرنې ریاست په همکارۍ یې په خپله یو جریب ځمکه کې د املوکو باغ جوړ کړی دی.</p>
<p style="text-align: justify;">نوموړي وویل، پخوا به یې پر یاده ځمکه غنم او شولې کرلې، خو اوس یې د حاصلاتو د کمښت له امله باغونو جوړولو ته مخه کړې ده.</p>
<p style="text-align: justify;">بلخوا د الیشنګ ولسوالۍ د قلعه ګلاحمد سیمې یو بل بڼوال شېراغا وايي، خوښ دی چې پر یو جریب ځمکه یې د مالټو باغ جوړ شوی.</p>
<p style="text-align: justify;">نوموړی له مرستندویه ادارو غواړي چې د تورې او سپېنې سرې، تخنیکي وسایلو، اصلاح شوو تخمونو او کرنیزو درملو په برخه کې دې هم ورسره مرسته وکړي.</p>
<p style="text-align: justify;">د یادونې ده، له دې وړاندې هم د ګڼ شمېر مرستندویه ادارو په مالي لګښت پر شاوخوا ۸ سوه هکتاره ځمکه بېلابېل ډوله باغونه جوړ شوي دي.</p>
