کابل (پژواک، ۸ کب ۱۴۰۲): د عدلیې وزارت وایي، په تېره یوه میاشت کې د هېواد په شپږو ولایتونو کې څه باندې ۱۶۸ زره جریب غصب شوې ځمکه راګرځول شوې او بېرته یې اړوندو ادارو ته تسلیم کړې ده.
د عدلیې وزارت له خوا خپره شوې خبرپاڼه کې راغلي چې دغه اندازه ځمکه د ځمکو د غصب مخنیوي تخنیکي پلاوو د کار نتیجه راګرځول شوې ده.
سرچینې د ټولو یادو شپږو ولایتونو نومونه نه دي اخیستي، خو وایي چې په تېره یوه میاشت کې تر ټولو ډېره (۱۶۶ زره جریبه) استرداد شوې ځمکه په ننګرهار، سرپل او کندهار ولایتونو کې ده.
سرچینې لیکلي، دغه راز د ځمکو د غصب مخنیوي پلاوو د یادې میاشتې په اوږدو کې څه باندې ۷۸۵ زره او ۸۱۰ جریب امارتي ځمکه د افغانستان په ۲۲ ولایتونو کې تثبیت کړې او ۷۸۰ زره او ۴۰۸ جریب نوره ځمکه یې تر څېړنې لاندې نیولې ده.
عدلیې وزارت لیکلي، د امارتي ځمکو د څېړنې، تثبیت او استرداد لړۍ په ټولو ولایتونو کې دوام لري او د غصب شوو زرګونه جریب امارتي ځمکو دوسیې، د ځمکو د غصب مخنیوي کمېسیون او په ولایتونو کې د یاد کمېسیون تخنیکي پلاوو تر څېړنې لاندې دي.
