کابل (پژواک، ۲۸ کب ۱۴۰۲): افغانستان کې د ملګرو ملتونو د خوړو او کرنې ادارې مرستیال وایي چې د ملخانو د افتونو کنټرول او مبارزې برخه کې له کرنې وزارت سره همکاري کوي.
د کرنې وزارت پر خپله اېکسپاڼه لیکلي، د دغه وزارت مرستیال مولوي صدراعظم عثماني په افغانستان کې د ملګرو ملتونو د خوړو او کرنې ادارې له مرستیال نجیب امیرزي سره تېره ورځ لیدلي او د ملخانو افت له زیانونو څخه د بزګرانو خوندیتوب په اړه یې خبرې ورسره کړې دي.
دغه وزارت ویلي، په دې لیدنه کې د کرنې، اوبو لګولو او مالدارۍ وزارت او د ملګرو ملتونو د خوړو او کرنې ادارې ترمنځ د همغږۍ او همکارۍ پر پیاوړتیا، د مالي او تخنیکي اسانتیاوو برابرولو او د ملخانو افتونو پر وړاندې د مبارزې لپاره د سیمهییزو کارپوهانو برابرولو په اړه خبرې اترې وکړې او د پلي کولو لپار یې راتلونکې طرحې له یو بل سره شریکې کړې.
په دې کتنه کې د کرنې او مالدارۍ مرستیال مولوي صدراعظم عثماني د هېواد بېلابېلو ولایتونو کې د ملخانو افتونو پر وړاندې د مبارزې برخه کې د کرنې وزارت چمتووالي په اړه خبرې وکړې او د ملګرو ملتونو د خوړو او کرنې ادارې له مسوولینو یې غوښتنه وکړه چې د درمل شیندنې دستګاوو بیارغولو او فعالولو او په تخنیکي او مالي برخو کې له دغه وزارت سره همکاري وکړي.
سرچینې ویلي، په دې کتنه کې د ملګرو ملتونو د خوړو او کرنې ادارې چارواکو په هغو ولایتونو کې چې د ملخانو د برید له ګواښ سره مخ دي، د ملخانو د افتونو کنټرول او مبارزې په موخه د پلان د تطبیق د پیل په اړه خبرې وکړې او د کرنې وزارت ته یې د لازمو همکاریو او همغږۍ ډاډ ورکړ.
دا په داسې حال کې ده چې د روان ۱۴۰۲ کال د غبرګولي میاشتې په ۲۳مه د کرنې، اوبو لګولو او مالدارۍ وزارت سرپرست په کابل کې د ترکمنستان له سفیر سره لیدنه کې هم ویلي وو چې د دواړو هېوادونو ترمنځ د همکارۍ او همغږۍ په چوکاټ کې د ملخانو افتونو پر وړاندې د مبارزې کمپاین پیلېدو ته اړتیا ده.
