<p style="text-align: justify;"><strong> </strong>فراه ښار (پژواک، ۲۷ وری ۱۴۰۳): د فراه د ټولګټو چارو ریاست مسوولین وايي چې د دغه ولایت د پرچمن ولسوالۍ لار د سېلابونو راوتو او غر ښویېدو له امله تړل شوې ده.</p>
<p style="text-align: justify;">د فراه د ټولګټو چارو ریيس مولوي عبدالودود معتصم پژواک ته وویل چې د وروستیو پرله پسې ورښتونو له امله د پرچمن ولسوالۍ پر لار څو ځایه سیلابونه راوتلي دي.</p>
<p style="text-align: justify;">دی وايي چې د سیلابونو له امله څو ځایه سړک تخریب شوی او په یو ځای کې غر هم ښویېدلی چې له امله یې د دې ولسوالۍ عمومي لار له مرکز او ګلستان ولسوالۍ سره تړل شوې ده.</p>
<p style="text-align: justify;">ده وویل، دوی هڅې روانې کړې دي چې ژر تر ژره دغه لویه لار د خلکو پرمخ پرانیزي.</p>
<p style="text-align: justify;">په ورته وخت کې، د فراه ولایت د پېښو پر وړاندې د مبارزې ریاست یوې سرچینې هم پژواک ته وویل: «د پرچمن ولسوالۍ لار څو ځایه سېلاب تخریب کړې چې دومره مشکل نه لري خو ستونزه ټوله د غره ښویېدنې جوړه کړې.»</p>
<p style="text-align: justify;">دغهراز د پرچمن ولسوالۍ یوه اوسېدونکي عبدالحمید حمید پژواک ته وویل چې د دې ولسوالۍ عمومي لار له مرکز فراه او ګلستان ولسوالۍ سره تړل شوې ده.</p>
<p style="text-align: justify;">هغه وايي: «که دا لار ژر خلاصه نه شي، پرچمن ډېره لرې ولسوالۍ ده خلک به د خوراکي شیانو له کمښت او نورو مشکلاتو سره مخ شي.»</p>
<p style="text-align: justify;">د یادونې ده، د پرچمن ولسوالۍ له مرکز څخه څه باندې ۳۰۰ کیلومټره واټن لري.</p>
