<p style="text-align: justify;">ګردېز (پژواک، ۲۸ وری ۱۴۰۳): د پکتیا په وزي ځډران ولسوالۍ کې د غره ښوېدنې له امله د یوې کورنۍ پنځه غړي مړه شوي دي.</p>
<p style="text-align: justify;">د پکتيا د پېښو پر وړاندې د چمتووالي رييس مولوي نثاراحمد نجات پژواک خبري اژانس ته وويل چې تېره شپه شاوخوا لس بجې د وزي ځډران ولسوالۍ په خوسا چینګي سیمه کې پر یوه کور غر راښویېدلی دی.</p>
<p style="text-align: justify;">هغه زیاته کړه چې په دې پېښه کې د محمدالدین په نوم یو کس، د هغه درې زامن او یوه لور یې مړه شوي دي.</p>
<p style="text-align: justify;">د نوموړي معلوماتو له مخې، د تېرو څو ورځو پرلهپسې ورښتونو له امله د پکتيا په ځینو سيمو کې تر ۵۰ پورې کورونه په نيمه او پوره ډول ویجاړ شوي او د سېلابونو راتلو له امله په ډېره کچه فصلونه هم له منځه تللي دي.</p>
<p style="text-align: justify;">د یادونې ده، تېره ورځ په کونړ ولایت کې هم پر یوه کور له غره ډبره رالوېدلې وه چې له امله یې یوه ښځه او یو ماشوم مړه شوي وو.</p>
