کندز ښار (پژواک، ۴ غویی ۱۴۰۳): کندوز کې د دوو کورنیو ترمنځ دښمني چې له امله یې یو کس وژل شوی و، د قومي مشرانو په منځګړیتوب پای ته ورسېده.
یو قومي مخور اغامیر ناصري چې تر اوسه یې په ډېرو شخړو او دښمنیو کې منځګړیتوب کړی پژواک ته وویل: «څه موده مخکې یاده شخړه د دوو کورنیو ترمنځ شوې وه او موږ له دواړو خواوو صلاحیت واخیست، دغه شخړه مو د قومي مشرانو په همکارۍ او د نظام په ملاتړ پای ته ورسوله.»
د ناصري په وینا، که کوم لوری له دې پرېکړې سرغړونه وکړي، د حکومت خزانې ته د یو میلیون افغانۍ په ورکولو مکلف دي.
بلخوا، د یادو کورنیو غړو چې له دې امله چې دښمني یې پای ته ورسېده، له قومي جرګې مننه وکړه.
نصرتالله چې له یادو کورنیو د یوې غړی دی، وايي: «خوښ یو چې داسې مشران لرو، د هغو خلکو احوال اخلي چې ترمنځ یې ستونزې وي، موږ له دې پرېکړې سرغړونه نه کوو، له ټولو هغو کسانو چې خپلمنځي شخړې لري، غوښتنه مو دا ده چې خپلې ستونزې پای ته ورسوي او له یو بل سره پخلا شي.»
ویسالدین چې له یادو یوې بلې کورنی غړی دی، هم د دې پرېکړې ستاینه وکړه، ويې ویل چې له دې وروسته به ارام ژوند ولري.
ورته مهال، د کندوز د استخباراتو ریاست د قومونو او قبایلو چارو مدیر مفتي سعید د قومي شخړو په هواري کې د قومي مشرانو د هڅو هرکلی کوي او وايي چې اسلامي امارت له قومي جرګو ملاتړ کوي.
قومي جرګې د افغانستان د خلکو ترمنځ د اختلافاتو د حل او فصل یوه لار ده چې تاریخي مخینه لري او په وروستیو دوو کلونو کې له لارې په کندوز کې نږدې دوه سوه شخړې هوارې شوې دي.
