محمودراقي (پژواک، ۴ غویی ۱۴۰۳): ستره محکمه وايي چې د کاپیسا د لومړۍ ښاري محکمې د پرېکړې پر بنسټ، پر دوو کسانو د غلا په جرم په عام محضر کې د تعزیري جزا حکم تطبیق شو.
د سترې محکمې په خبرپاڼه کې راغلي چې دغه حکم د دولتي کارکوونکو او عامو خلکو په حضور کې پلی شو.
د کاپیسا د ښاري محکمې رییس مفتي عبدالرؤف سعادت د دغه حکم د پلې کېدو پر مهال ویلي وو: «د کاپیسا ټولو خلکو ته ډاډ ورکوو چې د اسلامي شریعت د حکمونو په تطبیق کې له هېچا وېره نه لرو او هغه سزا چې شریعت مجرمینو ته ټاکلې ده، له کومې وېره پرته به یې خامخا تطبیقوو، له فتحې مخکې د سنګر مجاهدین وو او نن د الهي احکامو د تطبیق مجاهدین یو.»
د سرچینې د معلوماتو له مخې، د کاپیسا لومړۍ ښاري محکمې یو تورن کس په درې کاله تنفیذي بند او ۳۰ دورو او بل یې په یو کال او درې میاشتې تنفیذي بند او ۳۰ دورو محکوم کړي وو.
