کرنې ریاست: فراه کې سږ کال ۲۵۵ زره ټنه غنم تولید شوي

فراه (پژواک، ۲۲ جوزا ۱۴۰۳): د فراه کرنې ریاست وايي، سږ کال په دغه ولایت کې ۲۵۵ زره ټنه غنم تولید شوي چې د تېر کال په پرتله شاوخوا ۲۰ سلنه ډېروالی ښیي.

د فراه د کرنې او مالدارۍ رياست د کرنیزو چارو امر مولوي عبدالغني عابد پژواک خبري اژانس ته وویل، که څه هم د سږ کال ورښتونو په ځینو سیمو کې د غنمو فصلونه زیانمن کړي خو بیا هم د تېر کال په پرتله یې حاصلات ډېر دي.

د عابد د معلوماتو له مخې، تېر کال د دغه ولایت په ۷۸۰۰۰ هکټار ځمکه غنم کرل شوي وو چې ۲۱۴۵۰۰ ټنه حاصلات ترې ترلاسه شوي وو.

خو دی وايي چې سږ کال په دغه ولایت کې پر ۸۵۰۰۰ هکټار ځمکه غنم کرل شوي چې ۲۵۵ زره ټنه حاصلات ترې ترلاسه شوي او د تېر کال په پرتله شاوخوا ۲۰ سلنه ډېروالی ښیي.

بل لورته، کروندګر هم وايي چې سږ کال د غنمو حاصلاتو کچه لوړه ده.

د بکواه ولسوالۍ یوه کروندګر عبدالغني پژواک ته وویل چې سږ کال د غنمو د حاصلاتو کچه لوړه ده خو په بازار يې نرخونه د تېر کال په پرتله ټيټ دي.

دغه راز، یوه بل کروندګر قدرت‌الله هم پژواک ته وویل چې سږ کال ډېرو خلکو پر خپلو ځمکو غنم کرلي.

هغه زیاته کړه: «سږ کال اکثرو خلکو د غنمو کښت وکړ؛ ځکه تریاک بند وو خو بیا هم خلک تاواني دي دا ځکه چې نسبت پروسږ کال ته غنم ارزانه دي.»

د یادونې ده چې تېر کال په فراه کې دا مهال یو من غنم (پنځه کیلو) په ۱۲۰ افغانۍ وو خو سږ کال بیا همدا من په ۸۰-۸۵ افغانیو پورې پلورل کېږي.