مهترلام (پژواک، ۲۶ غبرګولی ۱۴۰۳): د لغمان ځايي مسوولین وايي، تېره شپه د دغه ولایت دولتشاه ولسوالۍ کې د یوه کور د خونې چت لوېدو پېښه کې یو ماشوم مړ او درې نور ټپیان شوي دي.
د لغمان د پېښو پر وړاندې د چمتووالي رییس قاري خیرمحمد غازي پژواک خبري اژانس ته وویل، تېره شپه شاوخوا درې بجې د دولتشاه ولسوالۍ په فرشغان سیمه کې د یوه کور د خونې چت لوېدو له امله یو ماشوم مړ او درې نور ټپيان شوي دي.
هغه زیاته کړه، یاد کور د سیند غاړې سره نږدې جوړ شوی چې د سیند اوبو ډېرېدو له امله یې خونه نړېدلې ده.
د نوموړي په خبره چې له یادې کورنۍ سره یې لومړنۍ مرسته کړې ده.
