لوګر کې لسګونه ښوونځي ودانۍ نه لري

<p style="text-align: justify;">پل‌علم (پژواک، ۱۰ چنګاښ ۱۴۰۳): د لوګر پوهنې ریاست وایي چې د دغه ولایت په مرکز پل‌علم او شپږو ولسوالیو کې ۹۰ ښوونځي ودانۍ نه لري او زده‌کوونکي یې له ګڼو ستونزو سره مخ دي.</p>

<p style="text-align: justify;">د لوګر پوهنې ریاست ویاند شاه‌پور عرب پژواک خبري اژانس ته وویل، په دغه ولایت کې د ۲۸۷ دولتي ښوونځيو له ډلې ۹۰ یې ودانۍ نه لري او سل نور یې بیارغونې ته اړتیا لري.</p>

<p style="text-align: justify;">عرب زیاته کړه، روان کال پوهنې وزارت د یو شمېر کورنیو او نړۍوالو بنسټونو په همکارۍ ۱۴ ښوونځيو ته نوې ودانۍ جوړوي او ۱۳ ښوونځي هم بیارغوي.</p>

<p style="text-align: justify;">هغه دغه راز وویل، اوس مهال د ملګرو ملتونو د ماشومانو ملاتړ صندوق (UNICEF) له لوري د شاوخوا ۱۱۵ میلیون افغانیو په لګښت د پوهنې برخه کې ۱۵ بېلابېلې پروژې تر کار لاندې دي.</p>

<p style="text-align: justify;">ورته وخت کې، د مرکز پل‌علم یوه ښوونکي میرویس پژواک ته وویل، په مرکز او ولسوالیو کې تر ټولو جدي ستونزه ښوونځیو ته د ودانیو نشتوالی دی.</p>

<p style="text-align: justify;">نوموړي د پوهنې پر وزارت او مرستندویو بنسټونو غږ وکړ چې پوهنې ریاست اړوند ښوونځيو ته معیاري ودانۍ جوړې کړي.</p>

<p style="text-align: justify;">دغه راز، د مرکز پل‌علم د عمر فاروق (رض) ښوونځي یوه زده‌کوونکي بسم‌الله پژواک ته وویل، په لرو پرتو سیمو کې ډېر ښوونځي ودانۍ نه لري او زده‌کوونکي یې له ګڼو ستونزو سره مخ دي.</p>

<p style="text-align: justify;">زده‌کوونکی وایي چې په ګرمه هوا او باد او باران پر مهال ډېرې کورنۍ خپل ماشومان هغو ښوونځيو ته نه استوي چې ودانۍ نه لري.</p>

<p style="text-align: justify;">د یادونې ده، اوس مهال د لوګر په ۲۸۷ ښوونځیو کې د نجونو په ګډون ۱۵۰ زره زده‌کوونکي په زده کړو بوخت دي.</p>