<p style="text-align: justify;">کابل (پژواک، ۲۳ زمری ۱۴۰۳): د شپږیزې کرکټ لیګ نهم پړاو سياليو په لړ کې بست لوبډلې سپینغر او بند امیر بیا د امو لوبډلې ته ماتې ورکړه.</p>
<p style="text-align: justify;">په دغو سیالیو کې نن دوه لوبې ترسره شوې.</p>
<p style="text-align: justify;">د نن ورځې لومړی لوبه د بست او سپینغر لوبډلو ترمنځ ترسره شوه، سپینغر لوبډلې لومړی توپوهنه ترسره کړه چې په ټاکل شوو ۲۰ اورونو کې یې د ۷ لوبغاړو په سوځېدو ۱۶۶ منډې وکړې.</p>
<p style="text-align: justify;">په نننۍ سیالۍ کې نوراحمد د سپینغر لوبډلې څلور لوبغاړي وسوځول.</p>
<p style="text-align: justify;">په مقابل کې ورکړل شوی هدف یې د بست لوبډلې د درېیو لوبغاړو په سوځېدو په ۱۹،۲ اورونو کې پوره کړ او سپین غر لوبډلې ته یې د ۷ وېکټو په توپیر ماتې ورکړه.</p>
<p style="text-align: justify;">دغه راز، د شپږیزې لیګ دویمه لوبه د بند امیر ښاماران او د امو نهنګان لوبډلو ترمنځ وشوه.</p>
<p style="text-align: justify;">په دې سیالۍ کې د امو لوبډلې لومړی توپوهنه وکړه او په ټاکلو٢٠ اورونو کې یې د ۷ لوبغاړو په سوځېدو ۱۴۷ منډې وکړې.</p>
<p style="text-align: justify;">د امو لوبډلې له لوري زبید اکبري نیمه سلیزه ووهله او په ۴۹ توپونو یې ۵۸ منډې جوړې کړې.</p>
<p style="text-align: justify;">په مقابل کې د بند امیر لوبډلې ورکړل شوی هدف د پنځو لوبغاړو په سوځېدو د شلم اور په دویم توپ پوره کړ او د پنځو وېکټو په توپیر یې امو لوبډلې ته ماتې ورکړه.</p>
<p style="text-align: justify;">دغه راز، د بند امیر لوبډلې له لوري تر ټولو زیاتې ۵۷ منډې حشمتالله شهیدي وکړې.</p>
<p style="text-align: justify;">د یادونې ده، پرون په یادو سیالیو کې بند امیر لوبډلې سپینغر ته او مس عینک لوبډلې بیا امو ته ماتې ورکړې وې.</p>
<p style="text-align: justify;"></p>
