<p style="text-align: justify;">کابل (پژواک، ۲۷ زمری ۱۴۰۳): د شپږیزه کرکټ لیګ نهم پړاو سياليو په لړ کې، سپین غر امو لوبډلې ته او مس عینک بیا بست لوبډلې ته ماتې ورکړه.</p>
<p style="text-align: justify;">شپږیزه کرکټ لیګ سیالیو کې نن دوه لوبې ترسره شوې، لومړی لوبه د سپین غر او امو لوبډلو ترمنځ او دویمه بیا د مس عینک او بست لوبډلو ترمنځ ترسره شوه.</p>
<p style="text-align: justify;">د نن ورځې په لومړی لوبه کې، د امو لوبډلې لومړی توپوهنه ترسره کړه او په ۱۹ اور کې ټوله لوبډله په ۱۰۵ منډو وسوځېده.</p>
<p style="text-align: justify;">د سپین غر له لوري په توپ اچونه کې بلال سمیع درې، ظاهر خان او عرب ګل بیا د امو لوبډلې دوه دوه لوبغاړي وسوځول.</p>
<p style="text-align: justify;">په مقابل کې د سپین غر لوبډلې ورکړل شوې هدف په ۱۱م اور کې د پنځو لوبغاړو په سوځېدو سره پوره کړ او امو لوبډلې ته یې د پنځو وېکټو په توپیر ماتې ورکړه.</p>
<p style="text-align: justify;">دغهراز د شپږیزه لیګ دویمه لوبه د مس عینک اتلانو او بست ساتونکو لوبډلو ترمنځ وشوه.</p>
<p style="text-align: justify;">په یاده سیالۍ کې د بست لوبډلې لومړۍ توپوهنه وکړه چې په شلم اور کې د ټولو لوبغاړو په سوځېدو سره ۱۶۷ منډې وکړې.</p>
<p style="text-align: justify;">د بست لوبډلې له لوري تر ټولو زیاتې ۶۷ منډې دروېش رسولي وکړې.</p>
<p style="text-align: justify;">د مس له لوري په توپ اچونه کې عبدالرحمن درې، وحید الله ځدراڼ، ضیا الرحمن او محمد نبي د بست لوبډلې دوه دوه لوبغاړي وسوځول.</p>
<p style="text-align: justify;">په مقابل کې د مس عینک لوبډلې ورکړل شوې هدف په ۱۹م اور کې د دوه لوبغاړو په سوځېدو سره پوره کړ او بست لوبډلې ته یې د اته وېکټو په توپیر ماتې ورکړه.</p>
<p style="text-align: justify;">د مس عینک لوبډلې له لوري وفیع الله تره خیل ۶۵ او نوید عبید ۵۲ منډې وکړې.</p>
<p style="text-align: justify;">د یادونې وړ ده، یادې سیالۍ د روانې اکست میاشتې په ۱۲مه په کابل کې پیل شوي چې تر دې مهاله په کې لس لوبې ترسره شوي دي.</p>
