ننګرهار کې لسګونه جريب د بنګو فصلونه واړول شول

<p style="text-align: justify;">جلال‌اباد (پژواک، ۵ وږی ۱۴۰۳): د ننګرهار امنيې قوماندانۍ له لوري په خوږياڼو او شېرزادو ولسواليو کې ۴۱ جريب د بنګو فصلونه له منځه یووړل شول.</p>

<p style="text-align: justify;">مسوولين وايي، په دغه ولايت کې يې د بنګو د اړولو کمپاين پيل کړی او تر هغه وخته به دوام ولري چې په ټول ولايت کې د بنګو بوټي له منځه يوسي.</p>

<p style="text-align: justify;">د ننګرهار ولايت د امنيې قوماندانۍ وياند حافظ عبدالبصير زابلي د وږي په ۵مه پژواک خبري اژانس ته وويل چې له تېرو درېيو ورځو راهیسې د دغه ولايت په خوږياڼو او شېرزادو ولسواليو کې د بنګو اړولو کمپاين دوام لري.</p>

<p style="text-align: justify;">هغه زياته کړه، د ياد کمپاين پر مهال پر ۴۱ جريبه ځمکه کرل شوي بنګ له منځه وړل شوي او کمپاين لا هم دوام لري.</p>

<p style="text-align: justify;">د زابلي د معلوماتو له مخې، د اسلامي امارت مشر د ځانګړي فرمان له مخې، په دغه ولايت کې د نشه‌يي توکو د کښت، قاچاق او کاروبار د مخنيوي کمپاين او هلې ځلې روانې دي.</p>

<p style="text-align: justify;">دی وايي، له بنګ دانو څخه د چرسو نشه‌یي توکي جوړېږي چې په ځينو ولسواليو کې د کوکنارو د کښت له مخنيوي وروسته کروندګرو د بنګو کښت ته مخه کړې خو دوی یې د مخنيوي لپاره هلې ځلې پيل کړې دي.</p>

<p style="text-align: justify;">بلخوا، ځایي اوسېدونکي که څه هم له دغه کمپاين خوښ دي خو له کروندګرو سره د مرستو غوښتنه کوي.</p>

<p style="text-align: justify;">اول خان چې د ننګرهار ولايت د خوږیاڼو ولسوالۍ د سپين راغه سيمې اوسېدونکی دی، وایي، په دغه سیمه کې د امنيتي منسوبينو له لوري د بنګو فصلونه اړول شوي دي.</p>

<p style="text-align: justify;">هغه وويل، د کروندګرو ځمکې کمې دي او په دې خاطر چې ګټه ورته وکړي، پخوا يې کوکنار او اوس بنګ کري، خو دا هم حکومت منع کړل نو حکومت هم باید د کروندګرو د ستونزو حل لپاره له هغوی سره مرستې وکړي.</p>

<p style="text-align: justify;">خو چارواکي وايي چې کروندګرو ته د بديل کښت لپاره وخت ناوخت اصلاح شوي تخمونه، کيمياوي سرې او نور اړين توکي ورکول کېږي.</p>