لوګر کې د  ترافیکي پېښو له امله شپږ کسان ټپیان شوي

<p style="text-align: justify;">پل‌علم (پژواک، ۶ وږی ۱۴۰۳): د لوګر امنیه قومانداني وایي چې د دغه ولایت په مربوطاتو کې د کابل - ګردیز پر لویه لار د څلورو ترافیکو پېښو له امله شپږ کسان ټپيان شوي دي.</p>

<p style="text-align: justify;">د لوګر امنیه قوماندانۍ ویاند مولوي احمدالله انس پژواک خبري اژانس ته وویل، له تېرې ورځې راهیسې د کابل - ګردیز پر لویه لار څلور ترافیکي پېښې رامنځته شوې دي.</p>

<p style="text-align: justify;">ده زیاته کړه چې په دغو پېښو کې د یوې ښځې او یوه ماشوم په ګډون شپږ کسان ټپیان شوي دي.</p>

<p style="text-align: justify;">نوموړي وویل، دغه ترافیکي پېښې په پل‌علم او الیاس خان کلا، علي خان کلا او بیات جومات سیمو کې د موټر چلوونکو د ګړندي تګ او بې‌احتیاطۍ له امله رامنځته شوې دي.</p>

<p style="text-align: justify;">هغه همدارنګه زیاته کړه، د یادو ترافیکي پېښو ټپیان د خلکو او امنیتي ځواکونو له لوري د لوګر ولایتي روغتون ته لېږدول شوي دي.</p>

<p style="text-align: justify;">د ده په وینا، د ځینو ټپيانو روغتیايي حالت نازک ښودل شوی دی.</p>

<p style="text-align: justify;">دا په داسې حال کې ده چې تر دې مخکې هم د کابل - ګردیز پر لویه لار ډېرې ترافیکي پېښې شوي چې ګڼو کسانو ته په کې مرګ ژوبله اوښتې ده.</p>