<p style="text-align: justify;">کابل (پژواک، ۱۱ وږی ۱۴۰۳): د کرنې، اوبو لګولو او مالدارۍ وزارت وایي، د یاد وزارت د متخصصینو یو پلاوی د چین، افغانستان او پاکستان ترمنځ په درې اړخیز کرنیز کنفرانس کې د ګډون په موخه چین ته تللی دی.</p>
<p style="text-align: justify;">د کرنې، اوبو لګولو او مالدارۍ وزارت له لوري په خپره شوې <a href="https://www.mail.gov.af/ps/%DA%86%DB%8C%D9%86-%D8%AA%D9%87-%D8%AF-%DA%A9%D8%B1%D9%86%DB%90-%D9%88%D8%B2%D8%A7%D8%B1%D8%AA-%D8%AF-%D9%BE%D9%84%D8%A7%D9%88%D9%8A-%D8%B3%D9%81%D8%B1-0">خبرپاڼه</a> کې راغلي چې د یاد وزارت د تخمونو تصدیق ورکونې رییس مولوي صدیقالله رحماني په مشرۍ پلاوی تېره ورځ د چین، افغانستان او پاکستان ترمنځ په درې اړخیز کرنیز کنفرانس کې د ګډون په موخه چین ته تللی.</p>
<p style="text-align: justify;">خبرپاڼه کاږي، دغه غونډه به د لسو ورځو لپاره د چين په شي ښار کې ترسره شي او د چين د ټولو کرنيزو پروګرامونو، د دغه هېواد د لس کلن کرنيز پلان او د چين د کرنې د بدلون او پرمختګ د عواملو په اړه به په کې خبرې اترې وشي.</p>
<p style="text-align: justify;">دغه راز، په دې غونډه کې به د کرنې برخې د کارګرانو او بزګرانو د ظرفیت د لوړولو او د کرنې په برخه کې د چین د ځان بسیاینې د څرنګوالي په اړه هم خبرې وشي.</p>
<p style="text-align: justify;">په دې غونډه کې به د پنبې، جوارو، د اوبو لګولو سیسټمونو، د اوبو لګولو د ټکنالوجۍ، جيایاېس او اېمایاېس او د کرنې پراختیا کې د هغو د کارولو په اړه هم خبرې وشي.</p>
<p style="text-align: justify;">ټاکل شوې چې دغه پلاوی په چین کې له کرنیزو تاسیساتو، کرنیزو وسایلو او ماشینونو او نورو کرنیزو پرمختګونو هم لیدنه وکړي او د دوی بریالۍ تجربې افغانستان ته انتقال کړي.</p>
