<p style="text-align: justify;">کابل (پژواک، ۲۰ وږی ۱۴۰۳): د ټولګټو وزارت وایي چې د کابل – غزني لویې لارې د دویم لین سړک د لومړي او دویم لاټ چارې نن د یو لړ مراسمو په ترڅ کې پیل شوې.</p>
<p style="text-align: justify;">د یادې پروژې د پرانیستې په مراسمو کې چې په میدان وردګو کې جوړ شوي و، د ټولګټو وزارت سرپرست ملا محمدعیسی ثاني وویل چې د دغه سړک چارې نن د کابل له ارغندۍ څخه د میدانوردګو د سیداباد تر ټوپ دښتې پورې عملاً پیل شوې.</p>
<p style="text-align: justify;">نوموړي وویل: «دا سړک د شیخ صاحب په امر حقالعبور باندې جوړېږي.»</p>
<p style="text-align: justify;">ده زیاته کړه چې د دغه سړک په اوږدو کې ۵۹۵ پولګوټي او ۹ پلونه هم موجود دي.</p>
<p style="text-align: justify;">د هغه په وینا، د کابل – غزني لویې لارې د دویم لین سړک اوږدوالی ۱۱۱ کیلومتره کېږي.</p>
<p style="text-align: justify;">دی زیاتوي چې اوسمهال د ۴۹ کیلومتره سړک قرارداد «یونیک بیلډر» شرکت ته ورکړل شوی او د پاتې ۶۲ کیلومتره لپاره له نورو شرکتونو سره خبرې روانې دي.</p>
<p style="text-align: justify;">دی وايي، پر دغه سړک اوسمهال ۱۳ ځایه کار پیل شو چې د یو کال په موده کې به یې چارې بشپړې شي.</p>
<p style="text-align: justify;">هغه وویل چې پر دې پروژه شاوخوا ۳ میلیارده افغانۍ لګښت راځي.</p>
<p style="text-align: justify;">دغه راز، په دې اړه جوړو شوو مراسمو کې د ریاستالوزراء اقتصادي مرستیال ملا عبدالغني برادر وویل چې دغه لویه لار د کابل او سوېلي ولایتونو ترمنځ د پله حیثیت لري چې د دغه سړک په جوړېدو سره به تګ راتګ اسانه او سوداګریزې اسانتیاوې به رامنځته شي.</p>
<p style="text-align: justify;">نوموړي زیاته کړه چې دا پروژه ستراتیژیک اهمیت لري او دغه راز د دغه سړک د جوړېدو له امله به پانګونه ډېره او کاري فرصتونه هم ایجاد شي.</p>
<p style="text-align: justify;">دی وايي، دوی د هېواد د ابادۍ لپاره کلک هوډ لري او له خلکو هم غواړي چې د یاد سړک د جوړولو په جریان کې له کارکوونکو سره بشپړه همکاري وکړي.</p>
<p style="text-align: justify;">ورته مهال، د قراردادي شرکت رییس حسیبالله کلیمزي بیا مسوولینو ته ډاډ ورکړ چې دغه پروژه به په نړۍوالو معیارونو او په ټاکلي وخت سر ته ورسوي.</p>
<p style="text-align: justify;">هغه زیاته کړه چې په دې پروژه کې سلګونو کسانو ته د کار زمینه برابره شوه.</p>
<p style="text-align: justify;">دا په داسې حال کې ده چې له دې مخکې د کابل – کندهار لویې لارې د بیارغونې چارې هم پیل شوې وې.</p>
