<p style="text-align: justify;">محمودراقي (پژواک، ۲۲ وږی ۱۴۰۳): د کاپیسا امنیه قومانداني وايي، په تېر یوه کال کې یې په دغه ولایت کې ۳۸۹ قضیو ته رسېدنه کړې، د نشهیي توکو ۱۱۱ جریب کښتونه یې له منځه وړي، ۵۵۰ روږدي یې روغتونونو ته معرفي کړي او دغه راز ۱۱۱ میلیون افغانۍ عواید یې هم راټول کړي دي.</p>
<p style="text-align: justify;">دغه راز، د امنیت ټینګښټ، د مجرمینو نیول او له خلکو سره همغږي ځیني نور مهم کارونه دي چې د کاپیسا امنیې قوماندانۍ یې پرون په یوه خبري غونډه کې په اړه معلومات ورکړل.</p>
<p style="text-align: justify;">امنیې قوماندانۍ د پولیسو د تشکیل زیاتول، هغوی ته مسلکي روزنه، د اداري کمپلېکس جوړول او په ولسوالیو کې د اطفایې فعالول خپل راتلونکي پلانونه یاد کړل.</p>
<p style="text-align: justify;">د کاپیسا امنیه قوماندان محمدعثمان ترابي په دې خبري ناسته کې وویل چې دې قوماندانۍ په تېر یوه کال کې د ۱۷۰۸۳ پاسپورټونو وېشلو له درکه نږدې ۹۱ میلیون افغانۍ عواید راټول کړي دي.</p>
<p style="text-align: justify;">هغه زیاته کړه: «په تېر یوه کال کې د امنیې قوماندانۍ د ترافیکو مدیریت کې ۵۲ پېښې ثبت شوې چې له امله یې ۱۱۳ کسان مړه شوي، دغه راز ۴۷۸۵ کسانو ته د موټر چلولو زدهکړه ورکړل شوې، ۱۲۶۵ کسانو ته د موټر چلولو لایسنسونه ورکړل شوي چې له دغو لارو په ټولیز ډول ۲۱ میلیونه ۴۰۹ زره او ۴۸۹ افغانۍ عواید ترلاسه شوي دي.»</p>
<p style="text-align: justify;">هغه وویل چې له نشهیي توکو سره د مبارزې مدیریت په تېر یوه کال کې د ۳۱۱ کیلوګرامه نشهیي د قاچاق په تور ۲۳۴ کسان نیولي دي.</p>
<p style="text-align: justify;">د هغه په وینا، تېر یو کال کې ۱۱۱ جریب ځمکه د نشهیي توکو له کښته پاکه شوې، ۵۵۰ روږدي کسان راټول شوي او د درملنې په موخه د معتادینو روغتون ته سپارل شوي دي.</p>
<p style="text-align: justify;">سرچینې زیاته کړه چې د ۳۸۹ جرمي قضیو په ثبتولو سره ۵۱۱ کسان نیول شوي، ۱۵ قضیې تر څېړنې لاندې دي او د تېر کال په پرتله د جنایي جرمونو کچه کې ۳۰ سلنه کموالی راغلی دی.</p>
<p style="text-align: justify;">ترابي وویل: «له تروریزم سره د مبارزې مدیریت برخه کې ۳۰ مشکوک کسان نیول شوي، پنځه میله درنې وسلې، ۷۶ بېلابېل ډول سپکې وسلې، ۳۱ تومانچې، دوه کامرې، ۱۸ ماینونه او ۸ زره ۴۰۰ او ۲۵ بېلابېل ډول مرمۍ د امنیتي ځواکونو لاس ته ورغلي دي.»</p>
<p style="text-align: justify;">هغه وايي چې ۴۵۰ پولیسو مسلکي زدهکړې کړې او پر نظامي یونیفورم سمبال شوي دي.</p>
<p style="text-align: justify;">هغه یادونه وکړه چې د کوهستان په لومړۍ حصه او تګاب ولسوالیو کې د اداري کمپلېکس ودانۍ جوړول او اطفایې رامنځته کول او د امنیت ټینګښت لپاره په ښار او ولسوالیو کې د امنیتي کامرو نصبول د دې قوماندانۍ له راتلونکو پلانونو دي چې عملي به شي.</p>
<p style="text-align: justify;">دغه خبري ناسته د کاپیسا امنیې قوماندانۍ په انګړ کې جوړه شوې وه چې د اسلامي امارت ځینو مسوولینو هم ګډون په کې کړی و.</p>
<p style="text-align: justify;">د کاپیسا مرستیال والي شیخ اسدالله سنان وویل: «د خوښۍ ځای دی چې نن مجاهدین او امنیتي ځواکونه په یوه یونیفورم کې دلته راټول شوي، د منظم یونیفورم درلودل، د دندو د ښه ترسره کولو لامل کېږي، نو زموږ پولیس باید د خلکو لپاره رښتیني خدمتګار وي.»</p>
<p style="text-align: justify;">د کاپیسا د علماوو شورا رییس شیخ احسانالله ناصح پر منظم یونیفورم د پولیسو سمبالېدل وستایل او ویې ویل: «نن تاسو یونیفورم اغوستی دی، دا یو امانت دی چې تاسو ته درکړل شوی او پر وړاندې یې مسوولیت لرئ.»</p>
