<p style="text-align: justify;">لښکرګاه ( پژواک ، ۲۶ وږی ۱۴۰۳ ) : هلمند کې سیمهییزې سرچينې وایي چې د دغه ولایت په مرکز لښکرګاه کې د کرکټ د ۱۸ لوبډلو ترمنځ د انټرکلب ۵۰ اووریزې ګروپي سیالۍ پیل شوې.</p>
<p style="text-align: justify;">د هلمند ولایت د اطلاعاتو او فرهنګ ریاست مرستیال مولوي شېرمحمد وحدت پژواک خبري اژانس ته وویل چې یادې سیالۍ د افغانستان کرکټ بورډ کورني کرکټ څانګي له لوري هر کال په ټول هېواد کې پیلېږي.</p>
<p style="text-align: justify;">ده وویل، د یادو سیالیو څخه هدف د وزیر محمداکبرخان دویمه درجه ولایتي سیالیو لپاره ښه استعدادونو انتخابول دي او دا لوبې نورو کلونو کې ۲۰ اووریزې وې خو سږ کال به ۵۰ اووریزه وي.</p>
<p style="text-align: justify;">بلخوا بیا د هلمند د کرکټ امر محمد ذاکر عمري وویل، هلمند انټرکلب سیالیو کې ۱۸ رسمي لوبډلو برخه اخیستې چې په درېیو ګروپونو وېشل شوي او هر ګروپ کي شپږ لوبډلي برخه لري.</p>
<p style="text-align: justify;">ده وویل چې یادې لوبې به دوه میاشتې دوام وکړي.</p>
<p style="text-align: justify;">ذاکر وایي، د دغو ټولو لوبډلو څخه بیا یوه منتخبه لوبډله جوړېږي چې د هېواد په کچه به ولایتي سیالیو ته لاره پیدا کړي.</p>
<p style="text-align: justify;">د هغه د معلوماتو له مخې، د یادو سیالیو په پیل کې لومړی لوبه د مجیب او سکون لوبډلو ترمنځ ترسره شوه چې د مجیب لوبډلې په بریا پای ته ورسېده.</p>
