ملګرو ملتونو روان کال افغانستان کې له ۱۵ زره ښځو سره مرسته کړې

کابل (پژواک، ۲۸ تله ۱۴۰۳): د ملګرو ملتونو د خوړو او کرنې سازمان اعلان کړی چې په ۲۰۲۴ کال کې یي په افغانستان کې د کورنیو له ۱۵ زره سرپرستو ښځو سره مرسته کړې ده.

یاد سازمان په یوه بیانیه کې لیکلي چې په دې مرستو کې د چرګانو وېش، واکسین ورکول او روزنیز خدمتونه شامل وو.

د یاد سازمان په وینا، ښځې د کورنیو د خوړو امنیت د تامین برخه کې مهمه ونډه لري.

د ملګرو ملتونو د خوړو او کرنې سازمان اعلان کړی چې د ملګرو ملتونو په مرسته خوړو ته د افغان ښځو لاسرسی ښه شوی او هغوی ته ښه راتلونکی تضمین شوی دی.

یاد سازمان دغه راز خوړو ته د لاسرسي لپاره د ټولو خلکو د حق پر تامین ټینګار کړی دی.

دا په داسې حال کې ده چې په وروستیو کې د ملګرو ملتونو د خوړو او کرنې سازمان د خوړو نړۍوالې ورځې په مناسبت ویلي وو چې په افغانستان کې له هرو درېیو کسانو یو کس د خوړو له ناامنۍ سره مخ دی.