<p style="text-align: justify;">زرنج (پژواک، ۲۸ لړم ۱۴۰۳): د نیمروز د مخابراتو او معلوماتي ټکنالوجۍ رییس په دغه ولایت کې د مخابراتي خدماتو د کیفیت ښه کېدو خبره کوي او وایي، د نوري فایبر د لېږد پروژه اویا سلنه بشپړه شوې او دغه راز د دغه ولایت په مرکز او ولسوالیو کې ۲۵ نوي مخابراتي سایټونه جوړ شوي دي.</p>
<p style="text-align: justify;">د نیمروز د مخابراتو او معلوماتي تکنالوجۍ رییس عبدالرحیم فیاض پژواک خبري اژانس ته وویل، په دغه ولایت کې د مخابراتي خدماتو له ټیټ کیفیته د نیمروز د اوسېدونکو له شکایتونو وروسته، د دغو خدماتو د کیفیت لوړولو په موخه اقدامات شوي چې اوسمهال نسبت تېر ته ښه شوي دي.</p>
<p style="text-align: justify;">هغه وویل، د مخابراتي خدماتو ښه والي په موخه تېرو درېیو میاشتو کې د نیمروز په مرکز او ولسوالیو کې ۲۵ نوي سایټونه جوړ شوي او دمګړۍ د څو نورو سایتونو جوړولو کار هم روان دی چې ژر به بشپړ شي.</p>
<p style="text-align: justify;">هغه زیاته کړه: «ټولې ولسوالۍ تر پوښښ لاندې دي، ځيني کلي چې له مخابراتي خدمتونو محروم دي، موږ له مخابراتو او معلوماتي تکنالوجۍ وزارت سره همغږي کړې، وزارت د سایټونو جوړول منظور کړي او ډېر ژر به یې چارې په هغو سیمو کې هم پیل شي.»</p>
<p style="text-align: justify;">هغه وایي، مخکې په نیمروز کې یوه شرکت مخابراتي خدمات وړاندې کول، اوس دغه خدمات ۵ شرکتونه وړاندې کوي چې خپلو کې سیالي لري څو غوره او ارزانه خدمات وړاندې کړي.</p>
<p style="text-align: justify;">د سرچینې د معلوماتو له مخې، نسبت تېر ته هر جي بي انټرنېټ له ۱۰ تر ۱۲ افغانیو ارزانه شوی، اوس په نیمروز کې د وایفای له لارې ۱۰۰ جي بي انټرنټ له ۱۰۰۰ تر ۱۲۰۰ افغانیو پورې لګښت لري.</p>
<p style="text-align: justify;">ده د مخابراتي خدماتو د کیفیت په اړه وویل: «مخکې په نیمروز کې د شرکتونو انټرنېټ ۲ جي و، بیا ۳ جي شو او دې وروستیو کې ۴ جي شوی، له دې ډلې کولای شو چې د روشن مخابراتي شرکت نوم واخلو چې مخکې یې له ۵ او اوس له ۱۰ میګاواټو فریکونسۍ څخه استفاده کوي.»</p>
<p style="text-align: justify;">د هغه په خبره، ځيني وخت چې خلک شکایتونه لري، لامل یې دا دی چې خلک له انټرڼېته ډېره استفاده کوي.</p>
<p style="text-align: justify;">د نیمروز د مخابراتو رییس دغه ولایت کې د نوري فایبر د لېږد پروژې چارو په اړه وویل، د دې پروژې کارونه تر ۷۰ سلنې بشپړ شوي او نږدې راتلونکي کې به سل په سلو کې بشپړ شي چې له بشپړېدو سره به یې د انټرنېټ سرعت ډېر شي.</p>
