د افغانستان سفارت: افغان کډوال هېڅ‌ کله پاکستان کې په سیاسي او جنايي فعالیتونو کې ښکېل نه وو

کابل (پژواک، ۱۱ لېندۍ ۱۴۰۳): پر افغان کډوالو د محدویتونو زیاتېدو په تړاو د پاکستاني چارواکو د وروستیو څرګندونو په دوام، په پاکستان کې د افغانستان سفارت اعلان کړی دغه ډول څرګندونې د دواړو هېوادونو ترمنځ د بې‌باورۍ فضا پیاوړې کوي.

پاکستان کې د افغانستان سفارت نن سهار (یکشنبه، د لېندۍ ۱۱مه) د یوې خبرپاڼې په خپرولو سره د پاکستان په اسلام‌اباد ښار کې «د عمران‌خان په ملاتړ لاریونونو کې د افغانانو د لاس لرولو» په بهانه د افغان کډوالو پر ژوند د محدویتونو په اړه د پاکستاني چارواکو د وروستیو څرګندولو په اړه خپله اندېښنه څرګنده کړې ده.

یاد سفارت لیکلي چې دغه ډول څرګندونې په پاکستان کې د افغان کډوالو د «بې‌دلیله ځورولو» زمینه برابروي او د دواړو هېوادونو ترمنځ د بې‌باورۍ فضا پیاوړې کوي.

اسلام‌اباد کې افغان سفارت ټینګار کړی چې افغان کډوالو هیڅ‌کله په پاکستان کې په سیاسي او جنايي پېښو کې لاس نه درلود او د دغه هېواد د چارواکو څرګندونې د افغان کډوالو ترمنځ د پام وړ اندېښنې راپورته کړې دي.

د پاکستان په اسلام‌اباد ښار کې د دغه هېواد د مخکني لومړي وزیر عمران‌خان د پلویانو د لاریونونو په دوام، پاکستاني چارواکو ویلي چې یو شمېر افغانانو هم په دغو لاریونونو کې ګډون کړی و او د نیول شوو شاوخوا زرو کسانو له ډلې ۳۷ کسان یې افغانان دي.

وروسته پاکستاني رسنیو د تېر اونۍ چهاشنبې ورځ د پاکستان د کورنیو چارو وزیر محسن نقوي په حواله راپور ورکړ چې د روان مېلادي کال د ډسمبر میاشتې له ۳۱مې وروسته افغانان نه‌شي کولای له اجازه‌لیک پرته په اسلام‌اباد کې ژوند وکړي.

هغه د جزئیاتو له ورکولو پرته ویلي وو: «افغان وګړي د سږ میلادي کال د ډسمبر له ۳۱مې وروسته نه‌شي کولای له اجازه‌لیک پرته په اسلام‌اباد کې ژوند وکړي. که غواړي دلته ژوند وکړي، باید د کمېشنر د مرستیال د دفتره اجازه‌لیک ولري.»

د یادولو ده چې د پاکستان حکومت د بې‌اسناده افغان کډوالو د ایستلو لړۍ د تېر میلادي کال په نومبر میاشت کې پیل کړه او لا هم دوام لري.

د کډوالو په چارو کې د ملګرو ملتونو عالي کمېشنري وايي چې د ۲۰۲۳ کال د سپټمبر میاشتې د ۲۰۲۴ کال تر سپټمبر پورې شاخوا ۵۸۸ زره افغان کډوال له پاکستانه خپل هېواد ته ستانه شوي دي.