<p style="text-align: justify;">کابل (پژواک، د مرغومې لومړۍ ۱۴۰۳): د ا.ا مشرتابه په یوه تازه فرمان کې سترې محکمې ته سپارښتنه کړې چې د مرکز په تشکیلاتو کې دې اړتیا او د اړوندو قضیو تراکم ته په کتو د تقاعد حقوقو اختصاصي محکمې جوړې کړي.</p>
<p style="text-align: justify;">د اسلامي امارت مشرتابه د روان ۱۴۰۳ کال د وري په ۱۲مه د يو حکم له مخې چې د مالیې وزارت ته لېږل شوی و، امر کړی و چې د روان لمریز کال له وري میاشتې دې د ملکي او نظامي کارکوونکو له معاشونو د تقاعد وضع کېدل بند شي.</p>
<p style="text-align: justify;">متقاعدینو په وار، وار له اسلامي امارته غوښتي چې د تقاعد حقوق یې ورکړي؛ ځکه چې دغه پیسې د هغوی له معاشونو ګرځول شوې دي. هغوی ویلي چې د اسلامي امارت له بیا واکمنېدو وروسته یې خپل د تقاعد معاشونه نه دي اخیستي.</p>
<p style="text-align: justify;">اوس د اسلامي امارت مشرتابه په دې اړه یو فرمان صادر کړی دی.</p>
<p style="text-align: justify;">پژواک خبري اژانس - د وزارتونو او امارتي ادارو د متقاعدینو او د برحاله کارمندانو د تقاعد د حقوقو د اجرا کولو په اړه - چې د هغوی له معاش څخه د تقاعد حقوق وضع شوي دي – د یاد اته مادهییز فرمان کاپي ترلاسه کړې ده.</p>
<p style="text-align: justify;">د دې فرمان بشپړ <strong><a href="https://pajhwok.com/wp-content/uploads/2024/12/فرمان-شماره-۱۲-مورخ-۹-۶-۱۴۴۶-عالیقدر-امیرالمؤمنین-حفظه-الله-در-مورد-حقوق-تقاعد-2.pdf">متن</a> </strong>لوستلو لپاره دا خای کېکاږئ</p>
<p style="text-align: justify;">د یاد فرمان په لومړۍ ماده کې راغلي، ستره محکمه مکلفه ده، په مرکز کې په خپلو اړوندو تشکیلاتو کې، د اړتیا او اړوندو قضایو تراکم ته په کتو، د تقاعد حقوقو اختصاصې محکمې جوړې کړي څو دغه محکمې د شریعت په رڼا کې یادې حقوقي قضیې حل کړي.</p>
<p style="text-align: justify;">د دغه فرمان د دویمې مادې په لومړۍ فقره کې راغلي، د وزارتونو او اماراتي ادارو متقاعدین کولای شي د خپل تقاعد د حقوقو د اثبات لپاره، د تقاعد د حقوقو اختصاصي محکمې ته عارض شي.</p>
<p style="text-align: justify;">د یاد فرمان د پنځمې مادې په لومړۍ فقره کې راغلي، د تشکیلاتو او معاشاتو د تنظیم کمېسیون مکلف دی چې پر عمومي بودیجه د فشار له واردولو څخه د مخنیوي په موخه، د متقاعدینو د تقاعد د اجرا کولو لپاره مهال وېش ترتیب کړي.</p>
<p style="text-align: justify;">د دغه فرمان په شپږمه ماده کې راغلي، د دې فرمان په لومړۍ، دویمه، درېیمه او څلورمه ماده کې درج شوي حکمونه د هغو متقاعدینو په هکله د پلې کېدو وړ دي چې د اسلامي امارت بیاځلې واکمنېدو څخه مخکې متقاعد شوي دي.</p>
<p style="text-align: justify;">د یاد فرمان د اوومې مادې په لومړۍ فقره کې راغلي: «د مالیې وزارت مکلف دی، د هغو کارمندانو د تقاعد ونډه چې له فتحې څخه وروسته د ۱۴۴۵ کال د نهمې میاشتې د ۲۱ مې نېټې د ۴۸۰۲ ګڼې حکم تر صدور پورې د هغوی تقاعد په حساب کې جمع شوی دی، د اړوندو بودجوي واحدونو له لارې، هغوی ته اجرا کړي.»</p>
<p style="text-align: justify;">د دغه مادې په دویمه فقره کې راغلي: «غیر بودجوي واحدونه (لکه ښاروالۍ) مکلف دي، د اړوندو کارمندانو ونډه چې له فتحې وروسته د ۱۴۴۵ کال د نهمې میاشتې د ۲۱ نېټې د ۴۸۰۲ ګڼې حکم تر صدور پورې د هغوی د تقاعد په حساب کې جمع شوې، د تعامل پر اساس د اړوندو بودجوي واحدونو له لارې، هغوی ته اجرا کړي.»</p>
<p style="text-align: justify;">د یادې مادې په څلورمه فقره کې راغلي: «غیر بودجوي واحدونه (لکه ښاروالۍ) مکلف دي چې د اړوندو هغو برحاله کارمندانو د تقاعد ونډه چې له د ۱۴۴۵ کال د نهمې میاشتې د ۲۱ نېټې د ۴۸۰۲ ګڼې فرمان حکم تر صدور پورې د هغوی د تقاعد په حساب کې جمع شوې ده، د اړوند تعامل پراساس هغوی ته اجرا کړي.»</p>
<p style="text-align: justify;">د یاد فرمان په پنځمه ماده کې راغلي، د دې مادې د لومړۍ، دویمې، درېیمې او څلورمې فقرې په درج شوو حالتونو کې، د محکمې حکم ته ضرورت نشته.</p>
<p style="text-align: justify;">د سترې محکمې مطبوعاتي دفتر پژواک خبري اژانس ته وویل چې یاد فرمان ورته رسېدلی او د تقاعد په اړه به ژر د خلکو ستونزې حل شي.</p>
<p style="text-align: justify;">د افغانستان د متقاعدینو ټولنې د معلوماتو له مخې، دا مهال په افغانستان کې د متقاعدینو شمېر شاوخوا ۱۷۰ زرو ته رسېږي.</p>
