کابل (پژواک، ۷ مرغومې ۱۴۳): د ریاستالوزراء سياسي مرستیال وایي، اسلامي امارت د سولې او یووالی پیغام لري خو که کوم لوری تاوتریخوالي ته لمن وهي، حتمي ده چې له جدي چلند سره مخ کېږي.
ارګ پر خپله اېکسپاڼه لیکلی، د ریاستالوزراء سياسي مرستیال مولوي عبدالکبیر یادې څرګندونې تېره ورځ د پکتیا ولایت څمکنيو ولسوالۍ ته د سفر په ترڅ کې د ضیاالعلوم مدرسې د دستار بندۍ په غونډه کې کړې دي.
هغه ویلي، اسلامي امارت د ټولو ښوونیزو مرکزونو پرمختګ ته له توپیر پرته پام لري او علما دې د ټولنې په اصلاح کې خپل دیني مسوولیت ادا کړي .
سیاسي مرستیال له علماوو او سیمهییزو مسوولینو غوښتي چې له خلکو سره همکاري وکړي او په هر حالت کې یې غږ واوري.
ارګ لیکلی: «مولوي عبدالکبیر د جدې شپږمې ته په اشارې وویل امریکا او ناټو په افغانستان کې د پخواني شوروي اتحاد ماتې ته پام ونه کړ او د افغان ولس د جهاد له برکته د امریکا د تاریخ اوږده جګړه ناکامه شوه.»
هغه زیاته کړې: «د اشغال له پای ته رسېدو وروسته او د اسلامي نظام په راتګ سره په افغانستان کې د جګړې توجیه نشته او افغانان تل د دین او افغاني ارزښتونو په دفاع کې ځنډ نه کوي.»
نوموړي دغهراز ویلي، اسلامي امارت د سولې او یووالی پیغام لري خو که کوم لوری تاوتریخوالي ته لمن وهي، حتمي ده چې له جدي چلند سره مخ کېږي.
د ده په خبره، اسلامي امارت د چا غوښتنو ته غاړه نه ږدي خو د اسلامي اصولو په رڼا کې له نړۍ سره اړیکې غواړي.
