اسعداباد (پژواک، ۱۸ مرغومی ۱۴۰۳): د کونړ د مخابراتو او معلوماتي ټکنالوژۍ ریاست وایي چې د دغه ولایت په یو شمېر غرنیو سیمو کې د ۱۸۲ میلیونه افغانیو په لګښت د ۲۶ نوو مخابراتي سایټونو د جوړېدو چارې پیل شوې دي.
د کونړ ولایت د مخابراتو او معلوماتي ټکنالوژي رییس عبدالولي مارشال پژواک خبري اژانس ته وویل، د دغه ولایت په یو شمېر غرنیو سیمو کې د ۱۸۲ میلیونه افغانیو په لګښت د ۲۶ نوو مخابراتي سایټونو د جوړېدو چارې پېل شوې چې په جوړیدو سره به یې د کونړ ۹۰ سلنه اوسېدونکي ټلیفوني او انټرنېټي خدمتونو ته لاسرسی پیدا کړي.
هغه وویل: «د خلکو اړتیا او غوښتنو ته په کتو، موږ د کونړ په بېلابېلو غرنیو سیمو کې چې پخوا په کې هیڅ ډول مخابراتي شبکو فعالیت نه کاوه، اوس مو په کې د ټلیفوني او انټرنېټي خدمتونو برابریدو لپاره هڅې پیل کړې دي.»
نوموړي وویل، د مخکیني حکومت پرمهال یوازې د کونړ ۴۰ سلنه سیمې تر مخابراتي پوښښ لاندې وې چې له تېرو درېیو کلونو راهیسې یې دغه کچه ۷۵ سلنو ته پورته شوې ده.
هغه زیاته کړه، د ۲۶ نویو مخابراتي سایټونو په فعالیدو سره به د کونړ ۹۰ سلنه سیمې د تلیفوني او انټرنېټي خدمتونو تر پوښښ لاندې راشي.
د مارشال په خبره، د مخابراتو وزارت د خاصې پاملرنې له امله د کونړ پنځو ولسوالیو ته د نوري فایبر د لاینغځونې چارې هم دوام لري چې په نږدې راتلونکې کې به ګټې اخیستنې ته وسپارل شي.
په همدې حال کې د کونړ اوسېدونکي خوښ دي چې په غرنیو سیمو کې ورته ټلیفوني او انټرنېټي خدمتونو پیلېږي.
د ماڼوګي ولسوالۍ اړوند د کړنګل سیمې اوسېدونکي امینالله وویل: «زموږ په سیمه کې چې لسګونه زره خلک ژوند کوي له ټلیفوني او انټرنېټي خدمتونو لرې دي، اوس خوښ یو چې اسلامي امارت راته مخابراتي اسانتیاوې برابروي.»
دغه راز، د وټهپور ولسوالۍ اړوند د یوز سیمې اوسېدونکي نقیبالله وویل، په سیمه کې یې مخابراتي خدمات محدود دي چې له امله یې دوی له ستونزو سره مخ دي.
هغه له اسلامي امارته غوښتنه وکړه چې د ټکنالوژي په دغه عصر کې باید دوی ته پياوړي انټرنېټي خدمتونه برابر کړي.
کونړ چې د جغرافیوي جوړښت له مخې یې زیاته برخه غرونو نیولې، په ګڼو لرو پرتو سیمو او درو کې یې لا هم مېشت خلک له ټلیفوني او انټرنېټي خدمتونو بېبرخې دي.
