کندهار ښار کې وسله‌والو غلو دوه‌ هټۍوال په ډزو ټپیان کړي

کندهار (پژواک، ۲۵ مرغومی ۱۴۰۳): د کندهار امنیه قومانداني وایي چې د کندهار ښار په سرپوښ بازار کې وسله‌والو غلو پر هټۍوالو ډزې کړې او دوه کسان یې ټپیان کړي دي.

د کندهار د امنیې قومانداني ویاند ملا اسدالله جمشید وايي، دغه پېښه د دوشنبې په ورځ ماښام ناوخته شوې او غله له پېښې وروسته له سيمې تښتېدلي دي.

هغه د غلو د دقیق شمېر په اړه څه نه وايي، خو په خبره یې چې د نیولو هڅې یې روانې دي.

ورته مهال، د سرپوښ بازار یوه هټۍوال چې خپل نوم یې نه اخیست پژواک ته وویل، مخ‌پټو غلو تېر ماښام په دغه بازار کې غوښتل له څو هټۍوالو پيسې واخلي چې د نورو خلکو له غبرګون سره مخ شول.

د هغه په خبره، غلو په سیمه کې له خلکو د خلاصون په موخه پر هټۍوالو ډزې وکړې چې دوه تنه په ‌کې ټپيان شول.

د یاد بازار هټۍ‌وال له ځايي مسوولینو غوښتنه کوي چې د دوی امنیت ته جدي پاملرنه وکړي.