د کابل په ۴۰۰ بستریز روغتون کې د سوء شکل هډوکو عملیات په بریالیتوب ترسره شول

کابل (پژواک، ۲۵ مرغومی ۱۴۰۳): د افغانستان د ملي دفاع وزارت وایي، د کابل سردار محمد داوود خان په ۴۰۰ بستریز روغتون کې د څلورو ماشومانو د سوء شکل هډوکو پېچلي عملیات په بریالیتوب ترسره شول.

د ملي دفاع وزارت په خبرپاڼه کې راغلي، څلور ماشومان چې له ولادي او کسبي معیوبیتونو او سوء شکل سره مخ وو «زمونږ د راتلونکي ماشومانو» موسسې له لوري جرمني هېواد ته د درمنلې لپاره لېږل شوي وو خو بشپړه درملنه یې نه وه شوې، هېواد ته له راستنېدو وروسته یادې موسسې د شهید سردار محمد داوود خان روغتون ته ور وپېژندل.

خبرپاڼه کاږي، د تېرو دوو اونیو په لړ کې يې د هډوکو پیوند (Bone Graft)، د هډوکو تثبیت(Fixation) او پلاستیکي جراحۍ عملیات د اورتوپیدي او ټراماتولوژۍ د جراحي متخصصینو له لوري او د یوه هندي متخصص په همکارۍ په بریالیتوب ترسره شول.

د خبرپاڼې د معلوماتو له مخې، دغو ماشومانو د جراحي پېچلتیاوو ترڅنګ د سوء شکل پاتې شونې او د مفصلونو کاذبې ناروغۍ ستونزې لرلې چې د ټولو څلورو ماشومانو د عملیات پایله ډېره قناعت بښونکې ده او په راتلونکي کې به خپل عادي ژوند ته دوام ورکړي.

د یادونې ده، له دې مخکې هم یو شمېر پېچلي عملیات د کابل سردار محمد داوود خان په ۴۰۰ بستریز روغتون کې په بریالیتوب ترسره شوي دي.