<p style="text-align: justify;">پل علم (پژواک، ۳ سلواغه ۱۴۰۳): د کورنیو چارو وزارت د تامیناتي چارو مرستیال په لوګر ولایت کې د علمي او جهادي څېرو په یاد جوړې شوې غونډې ته وویل چې اوسنی نظام باید ټولو ته له توپير پرته یو شان خدمات وړاندې کړي.</p>
<p style="text-align: justify;">د لوګر د اطلاعاتو او کلتور ریاست له لوري د دغه ولایت د درېیو علمي او جهادي څېرو مولوي میر احمدګل هاشمي، مولوي محمد داود جلالي او مولوي محمد ولي حقاني په یاده غونډه جوړه شوه.</p>
<p style="text-align: justify;">په دې غونډه کې د اطلاعاتو او کلتور او کورنیو چارو وزارتونو مرستیالانو، د پنجشیر، نیمروز او لوګر ولایتونو والیانو، علماوو، قومي مشرانو او ځوانانو ګډون کړی وو.</p>
<p style="text-align: justify;">د کورنیو چارو وزارت د تامیناتي چارو مرستیال مولوي عبدالله مختار حسیني وویل، ا.ا نظام د افغانانو د وینو په قربانۍ حاکم شوی دی.</p>
<p style="text-align: justify;">هغه وايي، نو اوسمهال اړتیا ده چې اوسنی نظام ټولو افغانانو ته له توپیر پرته اساسي خدمات وړاندې کړي.</p>
<p style="text-align: justify;">حسینې وویل، افغانانو ته اوسمهال پراخ فرصتونه په لاس ورغلي نو باید حکومت او خلک ترې ګټه پورته کړي.</p>
<p style="text-align: justify;">دغهراز د اطلاعاتو او کلتور وزارت فرهنګي مرستیال مولوي عتیقالله عزیزي وویل، د لوګر اطلاعاتو او کلتور ریاست د هیواد په کچه نوښت کړی چې د دغه ولایت د درېیو مخکښو جهادي شخصیتونو په یاد یې غونډه جوړه کړې ده.</p>
<p style="text-align: justify;">عزیزي د لوګر ولایت د علمي، جهادي او فرهنګي شخصیتونو ستاینه وکړه او په ځوانانو یې غږ وکړ چې د یادو شخصیتونو لارې خپلې کړي.</p>
<p style="text-align: justify;">دغهراز په یاده غونډه کې د نیمروز والي مولوي محمدقاسم خالد وویل، د لوګر جهادي مشرانو او اوسیدونکو د انګریزانو، روسانو او امریکایانو په ماتولو ډېرې قربانۍ ورکړې ده.</p>
<p style="text-align: justify;">ده وویل، د اسلامي امارت مشرانو او مسوولینو ته په کار ده چې د دغه ولایت اوسېدونکو ته په بېلابېلو برخو کې اساسي خدمات وړاندې کړي.</p>
<p style="text-align: justify;">دا په داسې حال کې ده چې تر دې وړاندې هم په لوګر کې د یو شمېر جهادي، علمي او کلتوري څيرو په یاد ورته غونډې جوړې شوې دي.</p>
