واورې د بامیان او دایکنډي ځینې مواصلاتي لارې تړلې دي

بامیان، نیلي (پرواک، ۲۲ سلواغه ۱۴۰۳): سیمه‌ییز مسوولین وايي چې په بامیان او دایکنډي کې د درنې وراورې ورېدو او سخت توپان له امله د دغو ولایتونو ځینې مواصلاتي لارې تړل شوې دي.

د بامیان د والي ویاند صبور فرزان سیغاني پژواک خبري اژانس ته وویل چې د وروستۍ واورې له امله د بامیان - دایکنډي ترمنځ قوناق کوتل، د یکاولنګ نمبر۱ او پنجاب ولسولیو ترمنځ شاتو کوتل، ابقول کرمان کوتل چې بامیان له غور سره نښلوي، د  پنجاب د سیاه‌درې او بندشوی پله لار چې بامیان له میدان‌وردګو سره نښلوي او د بامیان غور ترمنځ د بکک کوتل لاره د ترافیکو پر مخ تړل شوې دي.

هغه زیاته کړه چې د بامیان – کابل لار هم په حاجي‌ګک کوتل کې د تګ‌راتګ پر مخ تړل شوې خو دغه لار بیا د شیبر کوتل له لارې خلاصه ده.

د هغه په خبره، که څه هم ورښت او شدید توپان دوام لري، خو بیا هم د بامیان د ټولګټو ریاست هڅه کوي څو یادې لارې د ترافیکو پر مخ پرانیزي.

په همدې حال کې، دایکنډي کې ځايي مسوولین وايي چې د واورې ورېدو او بادوریې له امله د دایکنډي – بامیان ترمنځ صفري نطقه کې د قوناق کوتل په ګډون ټولې لویې لارې د تګ‌راتګ پر مخ تړل شوې دي.

د دایکنډي د والي ویاند غضنفر کاظمي وویل چې دغه لارې له تېرې شپې راهیسې تړل شوې دي.

هغه زیاته کړه چې په ټول دایکنډي کې واوره وریږي او په ډېرو ځایونو کې ۵۰ ساتني متره واوره شوې ده.

هغه وویل، د دایکنډي د ټولګټو ریاست هڅه کوي چې د واورې له درېدو وروسته دغه لارې بېرته د ترافیکو پر مخ پرانیزي.

د دغه ولایت د والي ویاند له ټولو ترانسپورټي شرکتونو او مسافرو غوښتي چې تر بلې خبرتیا پر یادو لارو له سفر کولو ډډه وکړي.