<p style="text-align: justify;">کابل (پژواک، ۳۰ سلواغه ۱۴۰۳): د امر بالمعروف او نهي عنالمنکر وزارت سرپرست په افغانستان کې د اسلامي همکاریو سازمان له استازي سره په لیدنه کې ویلي، دغه سازمان کولای شي د افغانستان او اسلامي نړۍ ترمنځ د ښو اړیکو جوړولو برخه کې مثبت رول ولوبوي.</p>
<p style="text-align: justify;">د امر بالمعروف، نهي عنالمنکر او شکایتونو اورېدو وزارت نن په یوه خبرپاڼه کې ويلي، د دغه وزارت سرپرست شيخ محمدخالد الحنفي په افغانستان کې د اسلامي هېوادونو همکاریو سازمان له ځانګړي استازي طارق علي بخیت، په افغانستان کې د دغه سازمان له سفیر محمدسعید عبدالله ال عیاش او مل پلاوي سره د همغږۍ او د همکاریو پیاوړتیا په موخه لیدلي دي.</p>
<p style="text-align: justify;">خبرپاڼه کې راغلي، په دې لیدنه کې د یاد وزارت سرپرست ویلي چې د امر بالمعروف او نهي عنالمنکر قانون د اسلامي اصولو په رڼا کې جوړ شوی او د ټولنې د معنوي اړخونو پیاوړتیا لپاره یې پلي کول اړين دي.</p>
<p style="text-align: justify;">هغه د اسلامي همکاریو سازمان او امر بالمعروف وزارت ترمنځ د اړیکو پر پیاوړتیا ټینګار کړی او زیاته کړې یې ده چې یاد سازمان کولای شي د اسلامي نړۍ او افغانستان ترمنځ د ښو اړیکو برخه کې مثبت رول ولوبوي.</p>
<p style="text-align: justify;">ورته مهال، په افغانستان کي د اسلامي همکاریو سازمان ځانګړي استازي طارق علي بخیت د ځینيو نړۍوالو رسنیو او ادرسونو له لوري د یاد وزارت پر وړاندې نیوکې له حقیقته لرې بللې او ویلي یې دي چې امر بالمعروف او نهي عنالمنکر د اسلامي ټولنې اساسي اړتیا ده.</p>
<p style="text-align: justify;">سرچینې لیکلي، بخیت دغه راز د یاد وزارت کړنې او لاستهراوړنې ستايلې او ډاډ یې ورکړی چې د امر بالمعروف، نهي عنالمنکر او شکایتونو اورېدو له وزارت سره بشپړه همکاري کوي.</p>
