مزارشریف (پژواک، ۲۲ کب ۱۴۰۳): د بلخ امنیه قومانداني وایي چې دغه ولایت کې یې د امنيت ټینګښت په موخه د موټرسایکلسپرو پولیسو ۴۶ کسیزه قطعه جوړه کړې ده.
د بلخ امنیې قوماندانۍ په خپره شوې خبرپاڼه کې راغلي: «د بلخ ولایت امنيه قومانداني د جنايي جرمونو د مخنیوي او چټک غبرګون په موخه ۴۶ کسیزه قطعه رامنځته کړه چې په پوځي تجهیزاتو سمباله ده.»
د خبرپاڼې د معلوماتو له مخې، دغه قطعه به په ۲۴ ساعته ډول فعالیت کوي څو د مزارشریف ښار د امنیتي وضعیت د ښه کولو لپاره مؤثر ګامونه پورته کړي.
خبرپاڼه کې ویل شوي چې دغه قطعه به د هر ډول پېښو په اړه په چټکۍ سره عکسالعمل ښیي او د امنیتي اړخونو په ډاډمن کولو کې به فعاله وي.
خبرپاڼه دغه راز کاږي: «د بلخ ولایت امنيه قوماندانۍ د امنیت امر احمدضیا خالد ډاډ ورکوي چې دغه ګروپ د جنايي جرمونو د مخنیوي او د خلکو د امنیت د تامین لپاره ژمن دی.»
د یادونې ده، له دې مخکې هم د هېواد په یو شمېر نورو ولایتونو کې د امنیت ټینګښت په موخه دغه ډول قطعې جوړې شوې وې.
GET IN TOUCH
NEWSLETTER
SUGGEST A STORY
PAJHWOK MOBILE APP