سمنګان کې د یوې هاوان مرمۍ چاودنې له امله درې کسان ټپیان شوي

ایبک (پژواک، ۲۸ غویی ۱۴۰۴): سمنګان کې ځايي مسوولین وايي چې د دغه ولایت په حضرت‌سلطان ولسوالۍ کې له تېرو جګړو پاتې یوې هاوان مرمۍ چاودنې له امله درې کسان ټپیان شوي دي.

د سمنګان امنیې قوماندانۍ ویاند حشمت‌الله رحماني پژواک خبري اژانس ته وویل چې یاده پېښه نن له غرمې مخکې د دغه ولایت حضرت‌سلطان ولسوالۍ په «ګوردره» سیمه کې شوې ده.

په وینا یې، د یادې ولسوالۍ درې تنکي ځوانان د څارویو څرولو پر مهال له یوې هاوان مرمۍ سره چې له تېرو جګړو پاتې وه، مخ شوي، د لوبو پر مهال مرمۍ چاودنه کړې او درې واړه ټپیان شوي دي.

رحماني زیاته کړه چې د یادې پېښې ټپیان د سمنګان ولایتي روغتون ته لېږدول شوي او تر روغتیايي مراقبتونو لاندې دي.