<p style="text-align: justify;">غزني ښار ( پژواک، ۲۶ غبرګولی ۱۴۰۴): د غزني سیمهییز مسوولین وایې چې په دغه ولایت کې د دوو جلا ترافیکي پېښو له امله درېیو کسانو ژوند له لاسه ورکړی او ۱۱ نور ټپيان شوي دي.</p>
<p style="text-align: justify;">د غزني ولایت د امنیه قوماندانۍ په خبرپاڼه کې راغلي چې لومړۍ پېښه تېره ورځ د غزني د آببند ولسوالۍ اړوند د کابل ـ کندهار پر لویه لار د سپين بند په سیمه کې د تېلو ټانکر، یوه مسافر وړونکي موټر او زرنج د ټکر له امله رامنځته شوې ده.</p>
<p style="text-align: justify;">سرچينې لیکلي چې په دغه پېښه کې دوو کسانو ژوند له لاسه ورکړی او نهه نور ټپیان شوي دي.</p>
<p style="text-align: justify;">سرچينې دغهراز ویلي، دویمه پېښه نن سهار د ګيلان ولسوالۍ اړوند د کابل- کندهار پر لویه لار توري پوستې ته څېرمه د یوه کرولا ډوله موټر د چپه کېدو له امله رامنځته شوې ده.</p>
<p style="text-align: justify;">امنیه قوماندانۍ لیکلي چې په دغه پېښه کې یوه کس ژوند له لاسه ورکړی او دوه نور ټپیان شوي دي.</p>
