منځپانګې ته تلل
شنبه ۲۱ نومبر ۲۰۲۶ · کابل ۳:۳۸ غ.و
۱۳°صاف · ↑۱۴° ↓۲°د هوا کیفیت: منځنی

پولیس وايي پکتيا کې یې څلور “غله” له ١٦ میلیونه کلدارو سره نیولي دي

· ۱ دقیقه لوستل · ۳۹۷ کتنې

کابل (پژواک، ۱۷ مرغومی ۱۴۰۴): د پکتيا امنیه قومانداني وایي، د “وسله والو غلو” هغه څلور کسيزه ډله یې نیولې چې وړمه ورځ يې له يو صراف څخه ۱۶ ميليونه پاکستانۍ کلدارې غلا کړې وې.

د پکتيا امنيه قوماندانۍ د خبرپاڼې له مخې، دغې څلور کسیزې ډلې د پکتیا زرمت ولسوالۍ په امیني‌خیلو سیمه کې د یو صراف د تښتولو هڅې پر مهال، د هغه له موټر څخه ١٦ میلیونه پاکستانۍ کلدارې غلا کړې وې.

سرچینه زیاتوي چې صراف د یادې ډلې له لوري په پښه ټپي شوی و، خو اوس یې روغتیايي وضعیت د ډاډ وړ دی.

د خبرپاڼې له مخې، امنیتي ځواکونو ياده څلورکسیزه ډله نیولې او غلا شوې پیسې یې هم ترې ترلاسه کړي دي.

د سرچينې د معلوماتو له مخې، یاد نیول شوي کسان به تر لومړنیو څېړنو وروسته، اړوندو عدلیې او قضایي ارګانونو ته وسپارل شي.