په جاپان د افغانستان سفیر شېدامحمد ابدالي ویلي چې د دې سفارت فعالیتونه له نن (شنبې) څخه ځنډول کېږي.
ابدالي په خپلې ایکس پاڼه خپره کړې اعلامیه کې لیکلي چې نن په توکیو کې د افغانستان د سفارت د فعالیت وروستۍ ورځ وه. هغه زیاته کړې: «په دردمن زړه توکیو پرېږدم.»
د یادونې وړ ده چې د روان کال د مرغومي په ۵مه، د جاپان په پلازمېنه توکیو کې د افغانستان سفارت مخکې هم اعلان کړی و چې د ۲۰۲۶ کال د جنورۍ له ۳۱مې وروسته به خپل فعالیتونه وځنډوي.
دې سفارت ویلي و چې دا پرېکړه له سلا مشورو وروسته د جاپان د بهرنیو چارو وزارت له لوري شوې او له ۲۰۲۶ کال د جنورۍ له ۳۱مې وروسته به د سفارت ټول سیاسي، اقتصادي، کلتوري او قونسلګرۍ فعالیتونه تر بل خبر پورې وځنډول شي.
