غزنيښار (پژواک، ۲۱ چنګاښ ۱۴۰۵): مسوولین وايي چې د غزني ولایت د ګیلان ولسوالۍ مربوطاتو کې د کابل – کندهار پر لویه لار د یوه ۵۸۰ بس موټر چپه کېدو له امله یوه کس ژوند له لاسه ورکړی او ۳۰ نور ټپیان شوي دي.
د غزني د والي ویاند میوندشاه احمدزي پژواک ته وویل چې دغه پېښه نن له غرمې مخکې د دغه ولایت د ګیلان ولسوالۍ د پښ کندې سیمه کې د غزني ـ کندهار پر لویه لار شوې ده.
هغه زیاته کړه، په پېښه کې یوه کس ژوند له لاسه ورکړی او ۳۰ نور ټپیان شوي چې د درملنې لپاره روغتیايي مرکزونو ته لېږدول شوي دي.
سرچینه وايي، لومړني معلومات ښيي چې پېښه د چلوونکي ویده کېدو له امله شوې خو د کره لامل معلومولو په اړه یې څېرنې پیل شوې دي.
د یادونې ده، د غزني ـ کندهار لویه لار د هېواد له بوختو ترانزیټي لارو ده او هر کال پرې د بېلابېلو لاملونو له امله لسګونه ترافیکي پېښې رامنځته کېږي چې ګڼو کسانو ته پکې مرګژوبله اوړي.
