دا راپور واورئ
۰:۰۰ / ۱:۰۰
کندهار (پژواک) – د کورنیو چارو وزارت وایي، د کندهار د احمدشاه بابا نړیوال هوايي ډګر سرحدي ځواکونو بهر ته د ۱۵۹ تاریخي سکو د قاچاق مخه نیولې او په تړاو یې یو کس نیولی دی.
د کورنیو چارو وزارت په خبرپاڼه کې راغلي چې دغه سکې د افغانستان د پخوانیو پاچاهانو، امانالله خان، نادرشاه او محمدظاهرشاه د واکمنیو له دورو سره تړاو لري.
سرچینه زیاتوي، یوه کس غوښتل یادې سکې په قاچاقي ډول له هېواده بهر ولېږدوي، خو د احمدشاه بابا نړیوال هوايي ډګر امنیتي ځواکونو کشف او ضبط کړې.
د یاد وزارت په وینا، نیول شوی کس به له څېړنو وروسته له ضبط شویو تاریخي سکو سره یوځای عدلي او قضايي ارګانونو ته وسپارل شي.
