نورالله ځاځی

د ریاست‌الوزراء اقتصادي معاونیت وايي چې د ملي تدارکاتو کمېسیون له جوړېدو بیا تر اوسه د شاوخوا ۸۰ میلیارد افغانیو په ارزښت ۲۹۰ بېلابېلې پروژې منظور شوې دي.

د افغانستان د لوړو زده‌کړو وزارت وايي، د کابل طبي علومو پوهنتون اړوند د کابل علي‌اباد تدریسي روغتون کې د ۱۷ میلیون افغانیو په لګښت د یوې درې پوړیزې ودانۍ جوړولو چارې پیل شوې.

د کابل ښار اتمه ناحیه کې د فرعي سړکونو او کوڅو جوړولو شپږ پروژې د ۴۷ میلیون افغانیو په لګښت بشپړې شوې.

د ۷۷ ترکي شرکت مشر د افغانستان د اوبو او انرژۍ وزارت له سرپرست سره په لیدنه کې ویلي، د اړوند وزارت د هوکړې په صورت کې غواړي په هرات کې د ۲۰۰ میګاواټه بادي برېښنا د تولید پروژه کې پانګونه وکړي.

د افغانستان د کانونو او پټرولیم وزارت له یوه ترکي شرکت سره د جوزجان ولایت یتیم تاق سیمې د سمنټو پروژې تړون د ۱۶۳ میلیون امریکایي ډالرو په ارزښت لاسلیک کړ.

دوحه کې د افغانستان سفارت وايي چې د افغانستان او قطر هېوادونو ترمنځ د پروازونو په برخه کې هوکړه‌لیک لاسلیک شو.

د افغانستان د عامې روغتیا وزارت وایي، د پکتیا په سیمه‌ییز روغتون کې د نږدې ۲۲ میلیون افغانیو په لګښت د بېړنیو پاملرنې څانګې یا (ICU) ودانۍ پاتې چارې پیل شوې.

د افغانستان د عامې روغتیا وزارت وايي، د هېواد په ۱۶ ولایتونو کې د ماشومانو د کوزڼ ضد (پولیو) واکسین درې ورځنی فرعي کمپاین پیل شو چې په ترڅ کې به یې شاوخوا ۶،۲ میلیون ماشومان واکسین شي.

د افغانستان د اطلاعاتو او فرهنګ وزارت د هنر او کلتور مرستیال د چین له سفیر سره په لیدنه کې ویلي، نړۍوال کلتوري سازمانونه او هېوادونه دې د افغانستان فرهنګي ارزښتونو خوندیتوب کې همکاري وکړي.

د پېښو پر وړاندې د چمتووالي ملي اداره وايي چې له یوې موسسې سره یې د څه باندې دوه میلیون او ۱۳۲ زره امریکایي ډالرو په ارزښت هوکړه‌لیک لاسلیک کړ.

د اسلامي امارت د مشرتابه په یوه فرمان کې اړوندو ادارو ته سپارښتنه شوې چې په بندرونو، عبوري نقطو او لویو لارو کې د سوداګرۍ لپاره لازمې اسانتیاوې برابرې کړي.

د کابل ښار اتمې ناحیې اړوند د کابل – لوګر سړک په اوږدو کې د بیني حصار له سیمې د ستانکزي تر څلورلارې او له یادې څلورلارې د بګرامیو تر نساجي د نښلوونکي سړک جوړولو چارې د ۳۲۰ میلیون افغانیو په لګښت پیل شوې.