د پکتیا حوزوي روغتون کې د بېړنۍ پاملرنې څانګې ودانۍ پاتې چارې پیل شوې

کابل (پژواک، ۷ لړم ۱۴۰۳): د افغانستان د عامې روغتیا وزارت وایي، د پکتیا په حوزوي روغتون کې د نږدې ۲۲ میلیون افغانیو په لګښت د بېړنۍ پاملرنې څانګې یا (ICU) ودانۍ پاتې چارې پیل شوې.

د افغانستان د عامې روغتیا وزارت له لوري نن په خپره شوې خبرپاڼه کې راغلي چې د یاد وزارت له لوري د پکتیا ولایت په سیمه‌ییز روغتون کې د نږدې ۲۲ میلیون افغانیو په لګښت د بېړنیو پاملرنې څانګې یا (ICU)  ودانۍ پاتې چارې پیل شوې.

خبرپاڼه کې راغلي، د بېړنیو پاملرنې څانګې د ودانۍ چارې چې پخوا ۴۱ سلنه ترسره شوي، پاتې ۵۹ سلنه چارې به د عامې روغتیا وزارت په مالي لګښت د ژمي تر وروستیو بشپړې شي.

د یو بل خبر له مخې، د عامې روغتیا وزارت له لوري نن په یوه بله خپره شوې خبرپاڼه کې راغلي چې په غزني ولایت کې د امبولانس خدمات فعال شول.

د خبرپاڼې په حواله، د عامې روغتیا وزارت سرپرست مولوي نور جلال جلالي غزني ولایت ته د سفر پر مهال د دغه ولایت عامې روغتیا ریاست اړوند د امبولانس خدماتو فعالېدو پرانیسته وکړه.

خبرپاڼه کاږي، له دې وروسته به د اووه عرادې عصري امبولانسونو په مرسته چې نږدې ۳۵۰ زره امریکايي ډالر ارزښت لري د لویو لارو ترافیکي پېښو او نورو بېړنیو حالاتو ته په وخت رسېدنه وکړي.