یو ترکي شرکت غواړي په هرات کې د بادي برېښنا د تولید پروژه کې پانګونه وکړي

کابل (پژواک، ۹ لړم ۱۴۰۳): د ۷۷ ترکي شرکت مشر د افغانستان د اوبو او انرژۍ وزارت له سرپرست سره په لیدنه کې ویلي، د اړوند وزارت د هوکړې په صورت کې غواړي په هرات کې د ۲۰۰ میګاواټه بادي برېښنا د تولید پروژه کې پانګونه وکړي.

د اوبو او انرژۍ وزارت نن پر خپله اېکس‌پاڼه لیکلي چې د دغه وزارت سرپرست ملا عبداللطیف منصور او د وزارت د اوبو معین مجیب‌الرحمن عمر اخندزاده د ۷۷ ترکي شرکت له رییس سلیمان جیلیو سره ولیدل.

سرچینې لیکلي، د وزارت چارواکو د ۷۷ ترکي شرکت له رییس سره د کجکي اوبو بند د چارو پرمختګ او وضعیت او د هرات د بادي برېښنا د تولید پروژې په هکله خبرې وکړې.

سرچینه زیاتوي، د یاد شرکت رییس زیاته کړې چې په پام کې لري، څو د اوبو او انرژۍ وزارت د رهبري مقام په هوکړې سره په هرات کې د ۲۰۰ میګاواټه بادي برېښنا د تولید پروژه کې خپله پانګونه وکړي.

ورته مهال، د اوبو او انرژۍ وزارت چارواکو د اوبو او انرژي پروژو پلې کولو برخه کې د نوموړي شرکت د کړنو په ستایلو سره د کجکي بند د دویم فاز چارو پر چټکتیا ټینګار وکړ.

منصور وویل، هڅه کېږي د هرات د ۲۰۰ میګاواټه بادي برېښنا د تولید پروژه کې د پانګونې په موخه د زمینې برابرولو لپاره اړینې ارزونې ترسره شي او ډېر ژر به د دې پروژې تړون لاسلیک شي.

د یوه بل خبر له مخې، د اوبو او انرژۍ وزارت د «دونګ فونګ» په نوم له یوه شرکت سره په افغانستان کې له بېلابېلو سرچینو د انرژي د تولید پروژو کې د پانګونې په موخه د ګډې همکارۍ هوکړه‌لیک لاسلیک کړ.

د اوبو او انرژۍ وزارت نن پر خپله اېکس‌پاڼه لیکلي چې دغه هوکړه‌لیک د یاد وزارت د سرپرست ملا عبداللطیف منصور او د «دونګ فونګ» شرکت مسوول «ژيا» ترمنځ لاسلیک شو.

سرچینې لیکلي، هوکړه‌لیک په افغانستان کې له بېلابېلو سرچینو د انرژۍ د تولید پروژو کې د پانګونې په موخه لاسلیک شو.

سرپرست وزیر د دغه هوکړه لیک د لاسلیک پر مهال وویل، اوسمهال په افغانستان کې له هر پلوه د پانګونې لپاره زمینه برابره ده.

منصور له یاد شرکته وغوښتل چې د انرژۍ د تولید برخه کې د پانګونې ترڅنګ د انتقالي مزو او توزیعي سب‌سټېشنونو پیاوړتیا برخه کې هم پانګونه وکړي، څو د انرژۍ د جذب زمینه هم‌مهاله د انرژۍ له تولید سره چمتو شي.

ورته مهال، د نوموړي شرکت مسوول د عملي چارو د چټکتیا برخه کې د ژمنې ترڅنګ د وزارت رهبري ته ډاډ ورکړ چې په افغانستان کې د انرژي د تولید، پراختیا او لېږد پروژو برخه کې به پانګونه ځانګړې کړي.

هغه وویل چې د پروژو پلې کېدو برخه کې به له نوې ټکنالوجۍ، تجربه لرونکي او متخصص ځواک څخه کار واخلي.

دغه راز، د اوبو او انرژۍ وزارت سرپرست ملا عبدللطیف منصور د افغان پامیر اکسوس (اپک) شرکت له ریيس سید محمدهاشم حسیني سره هم د انرژي په پروژو کې د پانګونې په موخه د همکارۍ هوکړه‌لیک لاسلیک کړ.

له دغه هوکړه‌لیک سره سم یاد شرکت په افغانستان کې له بېلابېلو سرچینو د انرژۍ د تولید پروژو کې د انتقالي مزو، د سب‌سټېشنونو جوړونه او پياوړتیا برخو کې پانګونه کوي، د اوبو او انرژي وزارت له دغه شرکت سره د پانګونې لپاره د زمینې برابرولو برخه کې همکاري کوي.