پل علم (پژواک ١١ مر غومى ٩٢): د لوګر د کانکور ستونزې د هواري په موخه يو پلاوى نن دغه ولايت ته په داسې حال کې ورغلى، چې لسګونو کسانو نن يو ځل بيا د لوړو زده کړو وزارت پر ضد لاريون وکړ.
لسګونه لاريون کوونکو، د مرغومي په ١١مه، د محمداغې ولسوالۍ اړوند د سفيد سنګ په سيمه کې لس بجې لاريون پيل او دوولس بجې يې پاى ته ورساوه.
دغو لاريون کوونکو د لوړه زده کړو وزارت پر خلاف د مرګ شعارونه ورکول او لوګر ته د کانکور د ورغلي پلاوي د مشر لطف الله ساپي د محاکمې غوښتنه يې کوله.
د مدني ټولنې فعال د لاريون ګډون کوونکى خان ولي احمدزى وايي، چې دوى د لوګريانو حق غواړي او له خپلې غوښتنې نه تېريږي.
د لغوه شوي کانکور يو ګډونوال عبدالصبور هم وايي، چې د دوى حق خوړل شوى او د خپل حق دفاع به وکړي.
دا په داسې حال کې چې نن د لوړو زده کړو وزارت د دوو مرستيالانو په ګډون يو پلاوى لوګر ته تللى و او د کانکور په اړه د را پيدا شوې ستونزې له امله يې د لوګر له خلکو بښنه وغوښته.
د لوګر د والي وياند دين محمد دروېش پژواک اژانس ته وويل، پلاوي پرېکړه وکړه، چې د روانې مياشتې په جريان کې به د لوګر له زده کوونکو دويم کانکور په لوګر کې اخيستل کېږي.
په لوګر ولايت کې د تېرې پنجشنبې په ورځ د کانکور ازموينه واخيستل شوه، چې په کې تر ٣٥٠٠ کسانو برخه اخيستې وه، چې شاوخوا٢٥٠ يې نجونې وې.
خو کله چې د لوړو زده کړو وزارت د کانکور پلاوى بېرته کابل ته ځي، نو په لاره د کانکور ازموينې اخيستل شوې پاڼې يې په ويالو کې اچولې وې.
د کانکو کمېټې مسوولينو ادعا کوله چې زده کوونکو په پراخه کچه نقلونه کړي وو.










