منځپانګې ته تلل
شنبه ۲۱ نومبر ۲۰۲۶ · کابل ۱۰:۲۰ غ.م
۱۱°ورېځ · ↑۱۴° ↓۳°د هوا کیفیت: منځنی

بادغيس: د ځنګله پر سر نښته کې اتو تنو ته مرګ ژوبله واوښته

· ۱ دقیقه لوستل · ۷۷ کتنې

قلعه نو (پژواک ١٩ چنګاښ ٩٣): تېره شپه د باغيس په مقر ولسوالۍ کې د پستې د ځنګله پر سر د دوو قومونو تر منځ په وسله واله نښته کې درې تنه وژل شوي او پنځه نور ټپيان دي.

د بادغيس د کرنې رييس حفيظ الله بينش پژواک خبري اژانس ته وويل، چې دغه نښته د مقر ولسوالۍ د چهل ګزي په سيمه کې د پستې د ځنګله د وېش پر سر رامنځته شوې ده.

دى وايي، چې نښته د ابکمري ولسوالۍ د “لاغري” قوم اړوند اوسېدونکو او د مقر ولسوالۍ د “محمکه” قوم د کسانو ترمنځ شوې ده.

سرچينه زياتوي، چې په نښته کې د لاغري قوم درې کسان وژل شوي او دوه نور ټپيان دي او دغه راز د مقابل لوري درې تنه ټپيان شوي دي.

د بادغيس د ولايتي روغتون مشر ډاکتر محمدابراهيم محمدي وايي چې دغه ټپيان ياد روغتون ته ور وړل شوي او د دوو تنو روغتيايي حالت يې د اندېښنې وړ دى.

د چهل ګزي سيمې اوسېدونکى ملا بسم الله وايي چې په نښته کې د ښکېلو قومونو کلي سره نږدې دي او دواړه د ياد ځنګله د ملکيت دعوه کوي.

خو بسم الله او د بادغيس د کرنې رييس دواړه وايي، چې د پستې ځنګل عام ملکيت دى او هر څوک ترې ګټه پورته کولاى شي.