جلال اباد (پژواک، ۳۱ زمری ۹۴): د ننګرهار پوهنتون لپاره د ليليې د څلور پوړيزې ودانۍ په ګټې اخيستنې سره ۱۲سوو محصلينو ته په ليليه کې د اوسېدو زمينه برابره شوه.
د پوهنتون ياده ليليه د ۲عشاريه ۵ ميليونه امريکايي ډالرو په لګښت په دريو بلاکونو او څلور پوړوڼو کې جوړه شوې چې ۱۳۰ خونې لري.
د نشه يي توکو پر وړاندې د مبارزې وزيره سلامت عظيمي او د ننګرهار ولايتي چارواکو د زمري په ۳۱مه ياده ودانۍ په رسمي ډول ګټې اخيستنې ته وسپارله.
سلامت عظيمي په دې تړاو خبري کنفرانس کې وويل چې په ۲۰۱۳ کال کې په ننګرهار ولايت کې د کوکنارو د کر کچه صفر شوې وه چې له امله يې د امريکا سفارت له لوري دغه ولايت ته د انعام په توګه ۱۰ ميليونه ډالر ورکړل شول.
د نوموړې په وينا، پر يادو پيسو د يو شمېر نورو پروژو ترڅنګ د ننګرهار پوهنتون لپاره د ليليې نوې ودانۍ چارې هم پيل شوې وې چې اوس ګټې اخيستنې ته وسپارل شوه.
ننګرهار پوهنتون له پخوا هم د سلګونه محصلينو لپاره د ليليې بېلابېل بلاکونه لري چې د پوهنتون د جوړېدو له وخت دي او ويل کېږي په اوسنۍ عصري بڼه نه دي.
د ننګرهار والي سليم خان کندوزي د دې پرانيستې په څنډه کې پژواک خبري اژانس ته وويل، چې د پوهنتون د ليليې لپاره دا ودانۍ اړينه وه.
د ننګرهار پوهنتون علمي مرستيال ناصر کامه وال پژواک ته وويل چې دا ليليه په ښه او عصري ډول جوړه شوې، ډېرې ستونزې به هواري کړي، خو ولايتي اداره يې بايد د برېښنا د نشت ستونزه حل کړي.
نوموړي يادونه وکړه: ((په دې ليليه کې ۱۲ سوه محصلينو ته د اوسېدو زمينه برابره شوه، زه به يې په عصري ډول جوړه شوې، د برېښنا ستونزه لري، زه يې په اړه هڅه کوم.))
د ننګرهار والي سليم کندوزي وويل چې د پوهنتون د بيارغونې لپاره نور پروګرامونه هم لري خو تشريح يې نه کړل.
د نشه يي توکو پر وړاندې د مبارزې وزارت له لوري د يادې پروژې يوه څارونکي انجنير ايمل هاشمي پژواک اژانس ته وويل چې په ياده ودانۍ کې ۹۶ خونې د اوسېدو لپاره، ۱۶ يې د مطالعې او څو نورې يې د کنفرانس خونې دي.
د هاشمي په وينا: ((موږ له دې پروژې او جوړوونکي ساختماني شرکت له کارونو نظارت کړی، کار يې ښه دی. په نقشه يې له موږ سره په تفاهم ځيني تعديلات وو؛ ځکه دا نقشه د مزار لپاره ډيزاين شوه وه.))
بلخوا د ننګرهار پوهنتون د انجنيرۍ پوهنځي استاد او د يادې پروژې لپاره د پوهنتون پلاوي غړي انجنير سيد جلال له رسنيو سره په خبرو کې وويل چې د يادې ودانۍ په جوړېدو کې درغلي شوې ده.
د نوموړي په وينا: ((په نقشه کې ياده ودانۍ د مخکې سړکونه هم لري، د مرکز ګرمۍ سيستم، د اور وژنې ډبې او نورې ډېرې اسانتياوې لري، چې اوس يې يو هم نشه.))
خو چارواکي او جوړوونکی شرکت بيا وايي چې کارونه يې د نقشې مطابق دي.
غړيYou need to subscribe to view the full article. Please login or register a new account.










