د چورلکې د بېړنۍ ناستې پېښه کې ٧ تنه ټپيان شوي

پل علم (پژواک، ١٢ وږى ٩٤): د لوګر په ازرې ولسوالۍ کې د يوې څرخي الوتکې د  بېړنۍ ناستې له امله د لوګر د کليو پراختيا د رييس په ګډون ٧ تنه ټپيان شوي دي.

د لوګر د والي وياند سليم صالح د وږي په ١٢مه پژواک خبري اژانس ته وويل چې نن له غرمې مخکې شاوخوا لس بجې يوې څرخي الوتکې په ازرې ولسوالۍ کې بېړنۍ ناسته کړې ده.

دى وايي: ((د کليو پراختيا وزير او خبريالان په يوه الوتکه کې او په بله الوتکه کې د لوګر د کليو پرختيا رييس ناست وو چې د تخنيکي ستونزې له امله دويمې الوتکې بېړنۍ ناسته کړې ده.))

د هغه په وينا، الوتکه د ناستې پر مهال د يوه دوکان له دېوال سره جنګېدلې چې له امله يې د لوګر د کليو پراختيا د رييس رحمت الله سروري په ګډون ٧ تنه ټپيان شوي دي.

صالح وايي، د کليو پراختيا وزير او خبريالانو ته کومه ستونزه نه ده پېښه شوې.

نوموړي وويل، ټپيان د درملنې په موخه روغتون ته لېږدول شوي، خو زياته يې کړه : ((وزير د خپل راتګ په اړه ولايت ته خبر نه و ورکړى.))

د لوګر د امنيې قوماندانۍ د جنايي جرمونو پر وړاندې د مبارزې مدير سمونوال محمدجان عابد هم ياده پېښه تاييد کړه.

ده هم وويل چې په دې پېښه کې د لوګر د کليو پراختيا د رييس په ګډون ٧ تنه ټپيان شوي چې پاتې شپږ کسان يې د الوتکې عمله ده.

دى زياتوي، يادې چورلکې په ملي دفاع وزارت پورې اړوند دي.

کابو يوه مياشت وړاندې (د زمري ١٤مه) د زابل ولايت په شينکۍ ولسوالۍ کې د ملي اردو يوه چورلکه غورځېدلې وه چې په کې دوولس سرتېري او پنځه تنه عمله چې پلوټان هم په کې شامل وو، وژل شوي وو.

 

 

 

 

غړي

You need to subscribe to view the full article. Please login or register a new account.