منځپانګې ته تلل
چهارشنبه ۱۸ نومبر ۲۰۲۶ · کابل ۵:۱۷ غ.و
۱۰°صاف · ↑۱۴° ↓۱°د هوا کیفیت: منځنی
غړي

وليزی: لوړو زده کړو وزارت د درسي کيفيت لوړولو هڅې پيل کړې دي

· ۳ دقیقې لوستل · ۹۹ کتنې

جلال اباد (پژواک، ۱۲ وږی ۹۴):د لوړو زده کړو وزارت اداري مرستيال وايي چې په پوهنتونونو کې يې د درسي او تدريسي کيفيت د لوړولو لپاره هڅې ډېرې کړې دي.

د ماسټرۍ پروګرامونو ته د استادانو معرفي کول او په درسي کريکولم کې تغييرات راوستل هغه طرحه ده چې لوړو زده کړو وزارت يې د کيفيت د لوړېدو لپاره تعقيبوي.

د دغه وزارت اداري او مالي مرستيال پوهنوال ګل حسن وليزي د وږي په ۱۲مه د ننګرهار پوهنتون د نوي رييس د معرفۍ په مراسمو کې وويل چې په کور دننه او بهر يې د استادانو لپاره د ماسټرۍ د زده کړو زمينې برابرې کړې دي.

پوهندوی استاد ببرک مياخېل د ننګرهار پوهنتون د نوي رييس په توګه وټاکل شو چې د معرفۍ په مراسمو کې يې پر ولايتي چارواکو سربېره د لوړو زده کړو وزارت ځينو چارواکو هم برخه اخيستې وه.

وليزي د دې غونډې په څنډه کې پژواک خبري اژانس ته وويل: ((موږ د هر پوهنتون لپاره د کيفيت لوړونې کمېټه جوړه کړې، کريکولم کې مو تغييرات راوستي او هر کال استادان د ماسټرۍ او دوکتورا په پروګرامونو کې جذبوو، البته د هېوادو په پوهنتونو سربېره يو شمېر استادان د زده کړو لپاره ترکيې ، ماليزيا او هند ته لېږو.))

هغه د ننګرهار پوهنتون د غوره پوهنتونونو له ډلې وباله او په هغې کې يې ځينو ستونزه ته هم اشاره وکړه چې په وينا يې نوې رهبري به يې د اصلاحاتو او حل لپاره هڅې کوي.

د ننګرهار پوهنتون نوی رييس پوهندوی استاد ببرک مياخېل يادې غونډې ته په وينا کې ژمنه وکړه چې په پوهنتون کې به د اصلاحاتو او سمون لپاره هڅې وکړي.

مياخېل وويل: ((پوهنتون کې ستونزه شته، خو زه به د استادانو په همکارۍ د هغې په حل کې مرسته وکړم، پوهنتون له محصل څخه يوازې او يوازې زده کړې غواړي.))

مياخېل يادونه وکړه چې د خپلې کاري دورې پر مهال به د ننګرهار پوهنتون انکشافي برخې او درسي کيفيت ته د استادانو په همکارۍ ډېره پاملرنه وکړي.

بلخوا د ننګرهار والي سليم خان کندوزي د پوهنتون نوي ټاکل شوي رييس ته د همکاري ډاډ ورکړ او زياته يې کړه چې له مرکزي حکومت يې غوښتي چې دغه پوهنتون ته پاملرنه ډېره کړي.

والي دا هم وويل: ((په ادارو کې تغييرات راتلل طبيعي مسئله ده، د ننګرهار پوهنتون د نوي رييس له ټاکل کېدو وروسته د څو نوو رييسانو او ولسوالانو د ټاکل کېدو پرېکړه هم شوې ده.))

د غونډې په پای کې د پوهنتون استادانو او د لوړو زده کړو وزارت پلاوي پوهندوی ببرک مياخېل په رسمي ډول معرفي کړ او د نوي رييس په توګه يې خپلې چارې پيل کړې.

استاد ببرک مياخېل د ژبو او دابياتو پوهنځي د استادۍ تر څنګ د ژورنالېزم پوهنځي د رييس په توګه دندې ترسره کړې او تر ماسټرۍ کچې يې  له زده کړو وروسته اوس د دوکتورا زده کړې پيل کړې دي.

 

 

 

 

غړي

You need to subscribe to view the full article. Please login or register a new account.

اړوند خبرونه

ټول ښوونه او روزنه