باميان (پژواک، ٢٣ وږى ٩٤): د فوايد عامې وزير وايي، که چېرې د روان کال تر پايه د کابل- باميان سړک د پخولو چارې بشپړې نه شي، له سرغړوونکي شرکت سره به قانوني چلند وشي.
دا ټکى د فوايد عامې وزير انجنير محمود بليغ باميانو ولايت ته د سفر پر مهال له پژواک خبري اژانس سره په ځانګړو خبرو کې څرګند کړ.
د ياد سړک د پخولو چارې د ميدان وردګو ولايت له لارې درى کاله وړاندې پيل شوې او تر اوسه يې کاري مهال دوه ځلې غځول شوى دى.
د فوايد عامې وزير پژواک ته وويل: ((د دې پروژې وروستۍ وعده د روان کال پاى ده چې بايد بشپړ شي.))
بليغ وويل چې باميانو ته يې د سفر موخه تر کار لاندې سړکونو په ځانګړي ډول د اووني کوتل د سړک څارل دي او زياته يې کړه چې که چېرې د باميان- کابل سړک کار د روان کال تر پايه له قرارداد سره سم بشپړ نه شي، له قراردادي شرکت سره به قانوني چلند وکړي.
د ميدان وردګو له مرکز ميدان نه د باميان تر اووني کوتل پورې د ٥٤ کيلومتره سړک پخول شپږ کاله وړاندې د ايټاليا په مرسته بشپړ شو، خو دويمه برخه يې ٨٢ کيلومتره کېږي چې له اووني کوتل نه د حاجيګک په لور غځېدلې او له هغه ځايه له باميانو ښار سره نښلي چې کار يې د يوه ايراني او يوه افغاني شرکت له خوا روان دى.
د باميانو د فوايد عامې رياست د معلوماتو له مخې، د باميان- کابل لويه لار ٨٢ کيلومتره اوږدوالى، اته متره پلنوالى او له نيم تر دوو مترو پورې دواړو خواوو ته څنګونه لري چې د ميدان وردګو له اووني کوتل څخه د باميانو د بازار تر لومړيو برخو پخېږي.
د دې پروژې بودجه ٧٤ ميليونه يورو ده چې اېټاليا ورکړې او د رغولو کار يې د ايران د ابادراهان پارس او غلغله ګروپ په نامه کورني شرکت له خوا پر مخ وړل کېږي.
سرچينې زياته کړه چې د دغه سړک ٤٧کيلومتره برخه په باميانو پورې اړه لري او ټاکل شوې وه چې د ٢٠١٥ کال تر مې مياشتې يې کارونه بشپړ شي.
خو د (ابادراهان پارس) په نوم ايراني شرکت اجرايي مشر محمدرضا خطيبي پژواک ته وويل، دوى هوډ لري چې دا پروژه په خپل ټاکلي وخت د قرارداد له معيارونو سره وسپاري، خو که چېرې يې سپارل يوه يا دوې مياشتې وځنډېږي، نو لامل يې د کارونو پېچلتيا ده چې د اېټاليا سلاکار په لسو مياشتو کې د کار په ساحه کې حاضر نه و او څارنه يې ورڅخه نه ده کړې.
هغه زياته کړه: ((د ډونر د استازي نه راتګ، په اقتصادي او مديريتي کارونو کې ځنډ رامځته کړ، خو د اجرايي کارونو په برخه کې کومه ستونزه نه ده پېښه شوې.))
په ورته وخت کې د باميانو والي محمد طاهر زهير دا لويه لاره د اهميت وړ وبلله او ويې ويل چې د هېواد له مرکز سره د باميانو د نښلېدو لنډه لار ده چې خلکو او د باميانو اوسېدونکو ته به ګڼې اسانتياوې رامنځته کړي.
زهير پژواک ته وويل چې د باميان- دوشي سړک کار او پخول د دې سبب کېږي چې د توتاپ د برېښنا او کاسا 1000 پروژې هم له باميانو تېرې شي.
غړيYou need to subscribe to view the full article. Please login or register a new account.
