ترينکوټ ( پژواک ۲۳ لړم ۹۴ ) : د اروزګان مرکز ترينکوټ کې د ښوونځي يوې زده کوونکې وروسته له هغه له کاغذ څخه مايکروسکوپ جوړکړ، کله چې د ښوونځي د ادارې له خوا مايکروسکوپ ورنه کړل شو .
ياده زده کوونکې پښتنه نومېږي اود مرکز ترينکوټ د ملالۍ لېسې د نهم ټولګي زده کوونکې ده .
پښتنې دلړم په ٢٣مه، په خپل لاس جوړ کړی مايکروسکوپ د ولايت مقام ته راوړی و ، ترڅو ددې ولايت والي او نورو چارواکو ته يې وښيي .
يادې زده کوونکې پژواک خبري اژانس ته وويل چې دغه مايکروسکوپ يې وروسته تر هغه جوړ کړ چې د ښوونځي د ادارې له خوا څخه د عملي زده کړو لپاره د ښوونځي مايکروسکوپ ورنه کړل شو.
نوموړې وايي د کاغذ څخه جوړکړی مايکروسکوپ يې په لږو امکاناتو د دوو ورځو په لړ کې جوړ او زياته يې کړه که زمينه ورته برابره شي نو تردې به ښې اختراع ګانې وکړي .
هغې زياته کړه، چې په ښوونځی کې د مسلکي ښوونکو نه شتون، د درسي کتابونو کموالی او د ادارې له خوا د عملي زده کړو لپاره وسايلو ته د نه لاسرسي ترڅنګ کلتوري ستونزې يې پر وړاندې لويې ننګونې دي.
د اروزګان والي محمد نذير خروټي د ښوونځی د يادې زده کوونکې دا کړنه وستايله او ژمنه يې وکړه چې د ولايت مقام به تل له دوی سره همکار وي او هغه ستونزې چې د دوی پر وړاندې شتون لري له منځه يوسي .
هغه وايي، چې که څه هم په دې ولايت کې د ښځو پروړاندې يوشمېر محدوديتونه شتون لري خو په وينا يې هڅه کوي ترڅو د قومي سپين ږيرو، ديني عالمانو او مدني فعالينو په وسيله يادو ناخوالو ته د پای ټکی کېږدي.
د خروټي په وينا، په اروزګان کې نه يواځې د تعليم په برخه کې د ښځو پروړاندې ستونزې شته، بلکې کورنی تاوتريخوالی او د دوی لپاره د امن د کور نه شتون هغه موارد دي چې دامهال دوی ورسره مخ دي.
پژواک هڅه وکړه، چې د ياد ښوونځي د مسوولينو نظر واخلي، خو بريالى نه شو.
غړي
You need to subscribe to view the full article. Please login or register a new account.










