کلات (پژواک، ٢٤ مرغومى ٩٤): په زابل ولایت کې تاريخي ځايونه د له منځه تلو له ګواښ سره مخ دي او جدي پاملرنې ته اړتيا لري.
د دغه ولايت ځينې اوسېدونکي او د اطلاعاتو او فرهنګ ریاست چارواکي وايي چې د زابل لسګونه تاريخي سيمي اوسمهال د له منځه تلو په حال کې دي.
د مرکز کلات ښار اوسېدونکي لعل محمد د مرغومي په ٢٤مه پژواک خبري اژانس ته وويل چې د شیخ مټي بابا مزار، د غشي رباط، د حسن متي مزار، ګرماو او شامردان تاریخي سیمي، په شینکۍ او شاه جوی ولسواليو کې جنګي تاريخي کلاګانې او نور تاريخې سيمې هم د له منځه تلو له ګواښ سره مخ دي.
په کلات کې قومي مشر اغامحمد هم اندېښمن دی چې د دغه ولايت ډېرې تاريخې سيمې د له منځه تلو په حال کې دي.
هغه وايي چې د دغه ولايت د اطلاعاتو او فرهنګ ریاست تر اوسه د تاريخي ځايونو د ساتنې لپاره هېڅ اقدام نه دى کړى.
هغه زياته کړه: ((په نورو ولايتونو کې تاريخي سيمو ته پاملرنه کېږي خو زموږ په سيمه کې نه کېږي حکومت بايد دوه ګونى چلند ونه کړي.))
خو د دغه ولایت د اطلاعاتو او فرهنګ رييس عبدالمقیم افغان پژواک ته وويل چې څو ځلې يې د تاريخي ځايونونو د ويجاړېدو مسئله له وزارت سره شريکه کړې ده.
هغه وايي چې ژمنې ورسره شوې دي خو تر اوسه د بيارغونې لپاره يې بوديجه نه ده ورکړل شوې.
هغه دا هم وويل چې يو شمېر تاريخي سيمې په نا امنو سيمو کې دي چې دوی نه شي کولاى د بيارغونې لپاره يې اقدام وکړي.
دا په داسې حال کې ده چې د زابل تر څنګ په يو شمېر نورو ولايتونو کې هم تاريخي سيمې او اثار د له منځه تلو په حال کې دي خو تر اوسه اړينه پاملرنه ورته نه ده شوې.
غړيYou need to subscribe to view the full article. Please login or register a new account.
