ښرنه (پژواک، ١٢ سلواغه ٩٤): د پکتيکا د کليو پراختيا رييس وايي چې په راتلونکي کال کې به د پنځه ميليونه امريکايي ډالرو په لګښت په دغه ولايت کې درې سوه پروژې پلې شي.
د پکتيکا د کليو پراختيا رييس نجيب الله جاهد د سلواغې په ١٢مه پژواک خبري اژانس ته د يوې ځانګړې مرکې په ترڅ کې وويل چې په ١٣٩٥ کال کې به د ملي پيوستون د پروګرام له لارې په دغه ولايت کې درې سوه بېلابېلې پروژې پلې شي.
دا په داسې حال کې ده چې د نا معلومو دلايلو له مخې له تېرو څو کلونو راهيسې په پکتیکا کې د ملي پيوستون پروژې نه دي عملي شوې.
خو جاهد وايي چې راتلونکی کال به د ملي پيوستون پروژې د مرکز ښرنې په ګډون په يو شمېر ولسواليو کې د سيمه ييزو شوراګانو او خلکو په همکارۍ پلې شي.
دى وايي چې د يادو پروژو لپاره پنځه ميليونه امريکايي ډالره په پام کې نيول شوي دي.
د هغه د معلوماتو له مخې، په دې پروژو کې پلونه، لارې، استنادي دېوالونه، د څښاک د اوبو څاګانې، ورزشي لوبغالي او ځينې نورې پروژې شاملې دي.
هغه زياته کړه: ((د دې پروژو په پلې کېدو سره به د ډېرو خلکو ستونزې هوارې شي او حکومت هم هڅه کوي چې په دغه ولايت کې ځينې نورې پروژې هم پلې کړي.))
خو د پکتيکا ولايت اوسېدونکي د ملي پيوستون له لوري د پروژو پر پلېدو نیوکه کوي.
د پکتيکا د مرکز ښرنې ښار اوسېدونکي ګلاب پژواک ته وويل چې د نورو ولايتونو خلاف په تېرو څو کلونو کې په دغه ولايت کې د ملي پيوستون پروژې نه دې پلې شوې.
ده وويل: ((موږ اوس هم خوښ يو چې زموږ په ولايت کې يو ځل بيا د ملي پيوستون پروژې پلې کېږي، خو د دغو پروژو چارې بايد هغه چا ته وسپارل شي چې د پلي کولو وړتيا يې لري.))
دغه راز د پکتيکا ولايت د مټاخان ولسوالۍ اوسېدونکي ابراهيم هم پژواک ته وويل چې د ملي پيوستون د پروژو په برخه کې حکومت له دغه ولايت سره د مور او میرې چلند کوي.
ده وويل چې په دولتي پروګرامونو کې بايد پکتيکا ولايت ته هم د نورو ولايتونو په څېر پوره ونډه ورکړل شي؛ ځکه دغه ولايت هم په ملي بوديجه کې خپله ونډه لري.
پکتيکا د افغانستان له نا امنه ولايتونو څخه دى چې له ګاونډي هېواد پاکستان سره لسګونه کيلومتره ګډه پوله لري.
غړيYou need to subscribe to view the full article. Please login or register a new account.
