خوست ښار (پژواک، ١٧ کب ٩٤): د پوهنې وزارت مسوولين وايي، پلان لري چې د هېواد په ټولو لېسو او منځنيو ښوونځيو کې ساينسي او رياضيکي مضمونونه د لابراتوار پر مټ په عملي بڼه تدريس شي.
په دغه وزارت کې د ساينس، ښوونيزې ټيکنالوجۍ او د لابراتوارونو ریيس عبدالسميع کبيري يادې څرګندونې د کب په ١٧مه په خوست کې د لابراتوار له سيميناره د ښوونکو د فراغت غونډې ته وکړې.
نوموړي وويل چې د لابراتوار د عملي زده کړو دغه يو مياشتنی سيمينار د هغه پروګرام يوه برخه ده چې غواړي په ترڅ کې يې د پورته ټولګيو د ساينسي علومو ښوونکي تر ډېره بريده مسلکي شي.
هغه زياته کړه چې ياد پروګرام د اوسمهال لپاره په خوست، کندهار او بدخشان ولايتونو کې د ايشيا فونډېشن په مالي لګښت په عملي ډول پيل شوی دی.
ده وويل: ((موږ پلان لرو، چې نږدې راتلونکی زموږ په ښوونځيو کې ساينسي او رياضيکي درسونه په عملي ډول زده کوونکو ته تدريس شي. موږ دا پروسه د هېواد ټولو ولايتونو او ولسواليو ته غځوو.))
د پوهنې وزارت د ساينس، ښوونيزې ټيکنالوجۍ او د لابراتوارونو د رييس عبدالسميع کبيري په وينا، د لابراتوارونو په برخه کې د ښوونکو روزنه د اوسني نصاب په تدريس کې هم له هغوی سره مرسته کوي.
ده زياته کړه: ((موږ غواړو چې له پخواني تدريسي مېتود څخه ښوونځي را وباسو. ښوونکي به د لابراتوار پر مټ تدريس ورکوي. هغه څه چې په لابراتوار کې نشته، د خپل محيط له امکاناتو به ګټه اخلي.))
نوموړي وويل، هر هغه ښووونځي ته چې ښوونکي يې د لابراتوار په برخه کې روزل کېږي، د لابراتوار ټول وسايل او د عملي تدريس ځيني نور امکانات ورکول کېږي.
د خوست د پوهنې رييس بخت نور بختيار پژواک اژانس ته وويل چې د دغه ولايت د ۱۲ ښوونځيو ۱۴۳ ښوونکي چې ۲۳ هغه يې ښځينه دي، په ياده برخه کې د يوې مياشتې په موده کې وروزل شول.
ده وويل، ښوونکو ته د خپلو اړوند مضمونونو په برخو کې ټول هغه څه په عملي ډول وښودل شول چې د نظري درسونو ترڅنګ يې زده کوونکو ته په عملي ډول تدريس ډېر اړين بلل کېږي.
بختيار وايي: ((زده کوونکي عملي زده کړو ته ډېره سخته اړتيا لري. همدارنګه په اوسني نصاب کې يې شته ستونزې هم ورته هوارې کړې. دا سيمينار ډېر مهم او ښه پايله به ولري.))
د پوهنې رييس بخت نور بختيار همدارنګه وويل چې ښوونکي په نورو مضمونونو کې هم ستونزې لري او له خپل اړوند وزارت څخه غوښتنه کوي چې په دې برخه کې هم ځانګړي پروګرام ته پاملرنه وکړي.
په خوست ښار کې د نجونو د بي بي حليمې لېسې ښوونکې کاملې پژواک اژانس ته وويل چې په ياد يو مياشتني سيمينار کې يې ډېر داسې څه په عملي ډول وليدل چې مخکې يې يواځې نومونه اورېدلي وو.
هغې وويل: ((موږ يواځې د باکترياوو نوم اورېدلی و، خو نه پوهېدو چې څه شی دي. د زړه په اړه مو ډېرې خبرې اورېدلې، خو عملي چا نه و راته ښودلی. موږ اوس زده کوونکې ښې پرې پوهولی شو.))
کاملې د پوهنې له مسوولينو وغوښتل چې د درسونو د کيفيت د ښه کولو او د زده کوونکو د ښې روزنې لپاره د ښوونکو د مسلکيتوب په برخه کې پوره هلې ځلې وکړي.
غړيYou need to subscribe to view the full article. Please login or register a new account.










