پل علم (پژواک، ٧وری ۹۵): د لوګر په بره کي برک ولسوالۍ کې د ملي اردو ځواکونو په يوه ښوونځي کې پوځي قرارګاه جوړه کړې چې له امله يې ښوونځى د زده کوونکو پر مخ تړل شوى دى.
د بره کي برک ولسوالۍ د چلتن سیمې یوه قومي مشر خالقداد د وري په ٧مه پژواک خبري اژانس ته وویل چې ملی اردو ځواکونو یې د سیمې په منځني ښوونځي کې پوځي قرارګاه جوړه کړې چې له امله يې سلګونه زده کوونکي له زده کړو بې برخې شوي دي.
هغه ووایی: ((حکومتي ځواکونه د دې پر ځای چی خلکو ته امنیت او د پوهنې او بیارغونې زمینې برابرې کړي، دوی په لوی لاس زموږ په ښوونځي کې خپله پوځي اډه جوړه کړې او د ښوونځي دروازه یې د زده کوونکو پر مخ تړلې ده.))
نوموړي له اړوندو چارواکو غوښتنه وکړه چې دغه ښوونځى بېرته د زده کوونکو پر مخ پرانيزي.
د چلتن منځني ښوونځي د اتم ټولګي زده کوونکي صابر هم پژواک ته وويل چې د دوى په ښوونځي کې د ملي اردو ځواکونو قرارګاه جوړه کړې ده.
ده وويل: ((له کومې ورځې چې نوى ښوونیز کال پیل شوی، موږ په دې نه يو توانېدلي چې ښوونځي کې خپلې زده کړې وکړو او نه راته عسکر ښوونځي ته د دننه کېدو اجازه راکوي چې دا کار زموږ پر وړاندې ستر خیانت دى.))
د لوګر د پوهنې رياست هم ياده موضوع تاييدوي.
د دغه ریاست ویاند محمد شاهپور عرب پژواک ته وویل چې د ملي اردو ځواکونو د تېر کال په ژمي کې دغه قرارګاه د چلتن د هلکانو په منځني ښوونځي کې جوړه کړې او تر اوسه په کې پراته دي.
عرب وایي: ((د ملي اردو د ځواکونو په دې کار سره د ښوونځي دروازه تړل شوې ده او درې سوه زده کوونکي له زده کړو بې برخې شوي او د پوهنې ریاست یې د غبرګون په ډول خپل اعتراض د ولایت مقام ته وړاندې کړى دى.))
د لوګر د والي وياند سليم صالح پژواک ته وويل چې د اړوندې موضوع په اړه سيمه ييزو چارواکو د ملي اردو له چارواکو سره خبرې کړې دي.
هغه زياته کړه: ((والي صاحب په امنيتي غونډه کې د څلورمې پلې لوا قوماندان ته سپارښتنه وکړه چې له دغه ښوونځي څخه خپله قرارګاه وباسي.))
د صالح په وينا، ډېر ژر به د ملي اردو ځواکونه له ياد ښوونځي څخه خپله قرارګاه وباسي او دغه ښوونځى به بېرته د زده کوونکو پر مخ پرانيستل شي.
په لوګر کې د ملي اردو چارواکو په دې اړه له څه ويلو ډډه وکړه.
دا مهال په لوګر ولايت کې ٣٠٥ ښوونيز مرکزونه فعال دي چې ١٤٠زره هلکان او نجوني په کې زده کړې کوي.
غړيYou need to subscribe to view the full article. Please login or register a new account.










